U MUS prakamientavali zajavy pra ŭcisk palityčnych aryštantaŭ na Akreścina
Pieršy sakratar Maładoha Frontu Maksim Urbanovič, jaki vyjšaŭ na volu 15 červienia, adbyŭšy aryšt na Akreścina, zajaviŭ pra cisk na palityčnych aryštantaŭ, jakija adbyvajuć sutki ŭ Centry izalacyi pravaparušalnikaŭ.
Jaho słovy apublikavała ŭ svaim fejsbuku Maryna Adamovič, žonka Mikoły Statkieviča.
«Takoha biaźmiežža ŭ CIPie nie było navat u horšyja časy. Ździeki, šantaž, biaźmiežža. Akramia taho, na dzień u źniavolenych adbirajuć matrasy, zabaraniajuć lažać, na padłohu kamiery štodnia vylivajuć viadro z chłorkaj, chłorku ž lijuć na asabistyja rečy. Pry hetym, astatnim, nie palityčnym, pastajanna kažuć: «Skažycie dziakuj palityčnym. Heta z-za ich», — piša Maryna Adamovič.
Urbanoviča 1 červienia asudzili na 15 sutak aryštu za «niesankcyjanavanaje mierapryjemstva» padčas pikietu pa zbory podpisaŭ za alternatyŭnych kandydataŭ u prezidenty. U toj dzień byŭ zatrymany i Mikoła Statkievič.
Na Akreścina znachodzicca i sustaršynia BCHD Pavieł Sieviaryniec. Ahułam jon maje adsiedzieć 75 sutak aryštu. Jaho žonka Volha napisała ŭ fejsbuku pra toje, što ŭ Paŭła «zabrali ŭsie rečy, u tym liku zubnuju ščotku, ciopłuju vopratku, srodki hihijeny, a taksama ŭžo dva razy adpraŭlali ŭ KPZ, dzie vielmi chałodna».
Volha piša pra heta, spasyłajučysia na słovy ludziej, jakija siadzieli z Paŭłam i vyjšli na volu. Taksama jana adznačaje, što pieradačy dla viaźniaŭ na Akreścina pierastali prymać.
Karespandent NN źviarnuŭsia pa kamientar u Ministerstva ŭnutranych spraŭ.
«Hetaja infarmacyja ŭvohule nijak nie adpaviadaje tamu, što jość na samaj spravie, — adkazała pres-sakratar MUS Volha Čamadanava. — Tak, na siońnia pieradačy nie prymajuć: heta vyklučna źviazana z epidemijałahičnymi mierapryjemstvami. Nijakich druhich padstaŭ dla taho niama.
Što tyčycca taho, što rečy nie dazvalajuć, nie dajuć spać nočču, adbirajuć matrasy. Pakolki hetaja infarmacyja ŭžo nie pieršy dzień u sacyjalnych sietkach, biezumoŭna, kiraŭnictva HUUS Minharvykankama — i heta robicca na sistemnaj asnovie — vyjazdžała ŭ CIP, i pravierki pravodzilisia pa ŭsich kirunkach. I ŭ jakich umovach utrymlivajucca zatrymanyja, i jak vykonvajucca ŭsie rasparadki. Videakamiery prahladalisia ŭ tym liku. Nijakich parušeńniaŭ nie vyjaŭlena», — adznačyła jana.
Na pytańnie karespandenta, ci nie varta vykłaści zapisy z tych videakamier u publičny dostup, kab supakoić hramadskaść, pres-sakratar adkazała, što «pakul padstavy, kab publikavać hetyja videa, niama».
«Jość unutranyja praviły dla zatrymanych. Kali praviły parušajucca, jość karekciroŭki dla tych, chto tam znachodzicca. Naprykład, skaračajuć špacyr na vulicy. Ale na siońniašni momant u mianie niama infarmacyi, što da zatrymanych chtości z supracoŭnikaŭ prymianiaŭ by fizičnuju siłu», — adznačyła Volha Čamadanava.
Kamientary