Rekord dla alternatyŭnaha kandydata. Kolkaść ludziej, jakija zapisalisia ŭ inicyjatyŭnuju hrupu Babaryki, nabližajecca da 10 tysiač
Bankir i miecenat Viktar Babaryka abviaściŭ, što da jaho inicyjatyŭnaj hrupy dałučyłasia ŭžo 9000 čałaviek. Heta rekordnaja ličba dla alternatyŭnaha kandydata ŭ prezidenty.
Alaksandr Łukašenka daklaravaŭ inicyjatyŭnuju hrupu ŭ składzie 11 tysiač čałaviek.
Miarkujučy pa zapisach u sacyjalnych sietkach miecenata, da Babaryki zapisvajucca prychilniki pieramien z roznych sacyjalnych hrup, ličačy jaho samaj pierśpiektyŭnaj alternatyvaj Alaksandru Łukašenku, jaki faktyčna samadziaržaŭna kiruje Biełaruśsiu ŭžo 26 hadoŭ.
Babaryka, jaki sprabuje abjadnać vakoł siabie šyrokuju kaalicyju roznych siłaŭ, pakul nie publikavaŭ svajoj prahramy. Na hetym etapie toje zabaroniena vybarčym zakanadaŭstvam. Svajoj minułaj dziejnaściu jon stvaryŭ sabie reputacyju čałavieka, jakomu nieabyjakavyja nacyjanalnyja kaštoŭnaści i pravy čałavieka. U toj ža čas jaho ŭsprymajuć jak ekanamičnaha prahmatyka, zdolnaha vybudavać adnosiny z Rasijaj. Babaryka doŭhi čas byŭ paśpiachovym mieniedžaram banka, što dla mnohich ujaŭlajecca vyrašalnym plusam u situacyi, kali Biełaruś pieratvaryłasia ŭ adnu z najbiadniejšych krain Jeŭropy i staić pierad nieabchodnaściu zmahańnia z karanavirusam.
Akramia Babaryki, namier kinuć vyklik Alaksandru Łukašenku zajavili były dypłamat, kiraŭnik Parku vysokich technałohij Valeryj Capkała (jaho inicyjatyŭnaja hrupa składaje 555 čałaviek) i byłaja deputatka Pałaty pradstaŭnikoŭ, pradprymalnica Hanna Kanapackaja (hrupa 1200 čałaviek).
Mikałaj Statkievič i jaho paplečniki padali na rehistracyju dziasiatkaŭ inicyjatyŭnych hrup, kab vieści ahitacyju suprać Alaksandra Łukašenki.
Asablivuju ŭvahu pryciahnuŭ samy papularny ŭ krainie videabłohier Siarhiej Cichanoŭski. Hetaha homielskaha pradprymalnika, žorstkaha krytyka Alaksandra Łukašenki, aryštavali napiaredadni abviaščeńnia vybaraŭ, kab jon nie moh padać svajoj zajaŭki. Tady zamiest jaho svaju kandydaturu vyłučyła jahonaja 38-hadovaja žonka Śviatłana Cichanoŭskaja.
Taksama na vybary iduć sparynh-partniory prezidenta Aleh Hajdukievič i Andrej Dźmitryjeŭ.
U svaju inicyjatyŭnuju hrupu Babaryka nabiraje ludziej praz sacyjalnyja sietki. U piatnicu jon padaŭ u Centrvybarkam 5600 podpisaŭ. Pa zakonie jon maje prava dapoŭnić śpis hrupy da viečara niadzieli.
Kamientary