Illa Lemiaza žyŭ u Fanipali Dziaržynskaha rajona, a na pracu jeździŭ u Minsk. Jon pracavaŭ doktaram UHD u pryvatnym miedycynskim centry «Tamahrafija» na vulicy Žyłunoviča. Heta, jak minimum, 11-ja śmierć miedrabotnika ŭ Biełarusi za čas epidemii.
Pra śmierć Lemiazy «Našaj Nivie» paviedamiła jahonaja ciešča.
«Jon byŭ doma na samaizalacyi. Užo i tempieratura prajšła, i kašal, my radavalisia hetamu. A potym za adzin dzień zhareŭ», — kaža žančyna.
Nie stała Illi Lemiazy 28 krasavika.
Što zapisana jak pryčyna śmierci? «Vy ž viedajecie, što jany ciapier pišuć usim — «nieŭdakładnienaja pnieŭmanija».
«Da momantu śmierci tata byŭ na samaizalacyi ŭ Minsku bolš za try tydni, i sa svajoj siamjoj nie kantaktavaŭ. U pieryjad znachodžańnia na samaizalacyi tata chvareŭ. U dzień śmierci, 28 krasavika, my patelefanavali jamu i pačuli pa telefonie, što tatu ciažka kazać, była dychavica. Adrazu patelefanavali ŭ chutkuju i paviedamili, što čałaviek zadychajecca i patrebna nieadkładnaja dapamoha. Heta było prykładna a 13:53. Vyklik pryniali. I tolki a 15:37 supracoŭnik chutkaj dapamohi paviedamiŭ pa telefonie, što dźviery nichto nie adčyniaje. Dzie była chutkaja amal dźvie hadziny? Kali kvateru adkryli, było ŭžo pozna. Test na karanavirusnuju infiekcyju jon nie rabiŭ», — skazała «NN» jahonaja dačka Hanna.
Doktaru było 56 hadoŭ. Jon skončyŭ vajskova-miedycynski fakultet pry Kujbyšaŭskim miedycynskim instytucie (Rasija). Mieŭ bolš za 30-hadovy staž pracy.
«Husty mužčynski hołas i zaraźlivy śmiech. Dobryja vočy i vialikija ruki. Serca, adkrytaje dla inšych… Voś tak ja i zapomniu svajho doktara, kalehu i siabra Illu Ivanaviča Lemiazu», — napisała ŭ fejsbuku byłaja hałoŭnaja doktarka «Tamahrafii» Emilija Miezina.
«Naša Niva» pisała pra 11 vypadkaŭ śmierci rabotnikaŭ miedustanoŭ ad pnieŭmanij za apošnija piać tydniaŭ.
Jany zdarylisia ŭ Viciebsku, Biešankovičach, Dokšycach, Stoŭbcach, Baranavičach, Fanipali, Lubani, Barysavie i Minsku (pamierłyja ŭ Stoŭbcach i Fanipali pracavali ŭ stalicy). Siarod pamierłych — 41-hadovaja miedsiastra ź Viciebska, 45-hadovaja miedsiastra z Dokšyc, 47-hadovaja miedsiastra ź Viciebska i 50-hadovy fielčar chutkaj dapamohi z Barysava. A ŭ Lubani pamior 54-hadovy doktar-renthienołah z paćvierdžanym karanavirusam. Mahčyma, heta nie poŭny śpis. Minzdaroŭja nie publikuje takoj infarmacyi aficyjna. ŚMI taksama nie majuć mahčymaści pravieryć aficyjnuju statystyku śmierciaŭ, bo pa asobnych rajonach jana nie publikujecca.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5151
Kamientary