Kiraŭnik biuro SAAZ u Biełarusi: Bieź mier fizičnaha dystancyjavańnia karanavirus nie strymać

Kožny dzień u Biełarusi vyjaŭlajuć bolš novych vypadkaŭ zaražeńnia COVID-19 na 1 miljon nasielnictva, čym u susiedziaŭ. Za apošnija sutki pryrost skłaŭ 846 novych vypadkaŭ. Heta mienš, čym u papiarednija dni. 29 krasavika było 973 novyja vypadki, 28 krasavika — 919. Pradstaŭnik SAAZ u Biełarusi Batyr Bierdykłyčaŭ adznačyŭ u intervju TUT.BY, što adna z hałoŭnych pryčyn imklivaha raźvićcia epidemii ŭ našaj krainie — adsutnaść adekvatnych mier fizičnaha dystancyjavańnia.

Pavialičyć

— Na dumku krainavaha biuro SAAZ, my ciapier na piku ŭ płanie zachvorvańnia COVID-19 abo pik jašče tolki budzie? Kali jaho čakać?

— Pavodle danych, jakija pradastaŭlajucca Ministerstvam achovy zdaroŭja, u krainie nazirajecca ŭstojlivy rost kolkaści novych vypadkaŭ COVID-19 na praciahu apošnich čatyroch z pałovaj tydniaŭ. Pry hetym temp pryrostu novych vypadkaŭ u Biełarusi źjaŭlajecca adnym z samych vysokich u Jeŭrapiejskim rehijonie SAAZ.

Raźvićcio epidemii šmat u čym zaležyć ad mier, jakija prymajucca ŭ adkaz u maštabach krainy.

Epidemija ŭ Biełarusi pierajšła ŭ fazu miascovaj tranśmisii infiekcyi siarod nasielnictva, što patrabuje nieadkładnych dziejańniaŭ pa ŭzmacnieńni mier fizičnaha dystancyjavańnia. Namahańniaŭ adnaho siektara achovy zdaroŭja na hetym etapie niedastatkova dla strymlivańnia i zapavolvańnia tempaŭ epidemii. Tamu, va ŭmovach adsutnaści adekvatnych mier fizičnaha dystancyjavańnia, u nas niama padstaŭ u najbližejšy čas čakać pierałomu ŭ płyni epidemii.

Prahnazavańnie piku zaležyć ad mnohich faktaraŭ, ale peŭna sudzić pra heta možna budzie tolki retraśpiektyŭna. Pry zachavańni isnujučaj situacyi my, chutčej za ŭsio, budziem vymušanyja nazirać dalejšy rost novych vypadkaŭ.

— Z čym, na vaš pohlad, ciapier źviazany rost kolkaści zachvarełych na COVID-19 u Biełarusi? Ci sapraŭdy heta źviazana z kolkaściu testaŭ, jakija pravodziacca, albo jość inšyja pryčyny?

— Kraina sapraŭdy robić surjoznyja namahańni pa pavieličeńni patencyjału łabaratornaha testavańnia na COVID-19. Heta adnaznačna ŭpłyvaje na pavieličeńnie vyjaŭlalnaści infikavanych, što vielmi važna dla ich dalejšaj izalacyi, lačeńnia i adsočvańnia kantaktaŭ. Adnak rost łabaratorna paćvierdžanych vypadkaŭ COVID-19 taksama źjaŭlajecca adlustravańniem situacyi z raspaŭsiudžvańniem epidemii ŭ krainie. Adnoj z hałoŭnych pryčyn imklivaha raźvićcia epidemii, jak ja ŭžo kazaŭ raniej, źjaŭlajecca adsutnaść adekvatnych mier fizičnaha dystancyjavańnia.

U rekamiendacyjach SAAZ Biełarusi padkreślivajecca nieabchodnaść pryniaćcia ahulnanacyjanalnych mier pa ŭzmacnieńni fizičnaha dystancyjavańnia, a mienavita:

• pieranos usich masavych zboraŭ ludziej, u tym liku spartyŭnyja, kulturnyja i relihijnyja mierapryjemstvy;
• ukaranieńnie farmataŭ addalenaj pracy i dystancyjnaha navučańnia, prypynieńnie dziejnaści ŭsich druhasnych arhanizacyj, pradpryjemstvaŭ i ekanamičnych subjektaŭ;
• zabieśpiačeńnie strohaha vykanańnia mier prafiłaktyki i infiekcyjnaha kantrolu na tych pracoŭnych miescach, dzie niemahčymaja addalenaja praca, u tym liku hihijenu ruk, reśpiratorny etykiet i fizičnaje dystancyjavańnie z zachavańniem biaśpiečnaj adlehłaści ŭ 1-1,5 mietra;
• zabieśpiačeńnie adlehłaści pamiž rabotnikami, abmiežavańnie kolkaści narad i sustreč i zabieśpiačeńnie naležnaj vientylacyi, asabliva ŭ miedycynskich ustanovach;
• minimizacyja nieabaviazkovych pierasoŭvańniaŭ, asabliva dla hrup vysokaj ryzyki i ŭraźlivych pacyjentaŭ.

Vopyt pakazvaje, što takija miery zapavolvajuć raspaŭsiud virusa i dazvalajuć miedycynskim słužbam vyjhrać čas, nieabchodny dla adekvatnaj padrychtoŭki, abstalavańnia i pieraacenki patrebaŭ rabotnikaŭ achovy zdaroŭja i ŭstanoŭ u adkaz na rost kolkaści pacyjentaŭ z COVID-19.

— Pa ahulnaj kolkaści vyjaŭlenych zaražanych na 1 miljon Biełaruś apiaredžvaje susiednija krainy. Pa vašych acenkach, z čym heta źviazana?

— Kolkaść vypadkaŭ na 1 miljon nasielnictva sapraŭdy infarmatyŭny pakazčyk dla acenki situacyi ŭ paraŭnańni ź inšymi krainami. Hety pakazčyk u Biełarusi vyšejšy, čym va ŭsich inšych krainach, jakija miažujuć ź Biełaruśsiu.

Ale pry takim paraŭnańni važna brać pad uvahu patencyjał krain pa praviadzieńni łabaratornaj dyjahnostyki dla vyjaŭleńnia infikavanych (kolkaść testaŭ na 1 miljon nasielnictva). Čym vyšejšy hety patencyjał, tym lepš i paŭniej kraina moža vyjaŭlać infikavanych. U Biełarusi hety pakazčyk paśladoŭna palapšajecca.

Ale, navat bieručy pad uvahu mahčymaści łabaratornaj dyjahnostyki krain, Biełaruś maje dastatkova vysoki pakazčyk pa kolkaści vypadkaŭ na 1 miljon nasielnictva, apiaredžvajučy, naprykład, krainy Bałtyi, Finlandyju, Słavakiju. Usie hetyja krainy stroha prytrymlivajucca mier fizičnaha dystancyjavańnia, što niesumnienna paŭpłyvała na strymlivańnie tempaŭ rostu epidemii.

• 0
• 0
• 0
• 0
• 0
• 0
• 0
• 0