«U karancinie ježy i vady nie chapała, a pa štości jašče nie schodziš — zabaroniena!». Bortpravadnik «Biełavija» raskazaŭ, jak pravioŭ u balnicy 14 dzion

Supracoŭnik «Biełavija» bortpravadnik Alaksandr (imia źmienienaje) pravioŭ 14 dzion u balnicy jak kantakt pieršaha ŭzroŭniu. Jaho špitalizavali paśla taho, jak u pasažyraŭ test pakazaŭ karanavirus. Alaksandr padzialiŭsia ŭražańniami z «Našaj Nivaj».

«Mianie pakłali ŭ balnicu jašče ŭ sakaviku. Situacyja takaja: ja pracavaŭ na rejsie, jaki lacieŭ ź Jeŭropy ŭ Minsk. I ŭ dvaich pasažyraŭ vyjavili karanavirus. Našu bryhadu adrazu izalavali.

Ja byŭ, adpaviedna, kantaktam pieršaha ŭzroŭniu. Simptomaŭ u mianie nie było, adčuvaŭ siabie taksama narmalna. Ale ŭnačy mnie pazvanili, skazali, što za mnoj pryjeduć. I ŭžo praz 2 hadziny daktary advieźli mianie ŭ balnicu. U tuju ž noč zabrali adnaho z kaleh, dvaich kaleh zabrali ŭ balnicu na nastupny dzień.

Pakłali mianie ŭ błok: dźvie pałaty pa dva čałavieki. Moj susied pa pałacie lacieŭ ź Jehipta. U susiedniaj lažaŭ moj kaleha i niejki mužčyna, jaki chadziŭ da doktara zašyvać hałavu, a paśla ŭ taho doktara znajšli karanavirus.

Vychodzić z pałaty zabaroniena navat na kalidor, maksimum možna adkryć dźviery.

Hałoŭny niehatyŭny momant u karancinie — adsutnaść infarmacyi. Vynik pieršaha analizu ahučyli tolki praz 8 dzion! Da hetaha my prosta lažali i čakali, što budzie. Niekatoryja panikujuć, pačynajecca ahresija. Simptomaŭ u našym błoku nichto nie mieŭ, tamu daktary zachodzili nie kožny dzień. Ale byli dumki, što kali choć adzin maje virus, to, napeŭna, zachvarejuć u vyniku ŭsie čaćviora ŭ błoku.

Taksama, naprykład, u mianie brali mazok, tłumačyli koratka: «Kantrolny». Što kantrolny, čamu kantrolny? Minuły što, byŭ pazityŭny? Tolki paźniej doktar usio ž rastłumačyŭ, što papiaredni analiz pa niejkich tam techničnych pryčynach nie zmahli zrabić.

Asobnaja tema — ježa i vada. U balnicy karmili ranicaj, u abied i apošni raz a 5-j hadzinie. I ŭsio. Ježy nie chapała, a pa štości jašče nie schodziš — zabaroniena! Taksama nie chapała vady. Spačatku prynieśli piacilitrovuju butelku na čaćviarych darosłych mužykoŭ, skazali — toje na dva dni. A kali jana skončyłasia, prapanavali kožny raz vyklikać miedsiastru, kab jana dała šklanku vady. Dobra, što vadu pieradavali svajaki, kali b nie, to pryjšłosia b niaprosta.

Z pazityŭnych momantaŭ chaču adznačyć miery biaśpieki i apieratyŭnaść, ź jakoj pracujuć daktary. U balnicy ŭsio zakryta, nichto nidzie nie chodzić, paŭsiul kvarcavyja lampy.

U vyniku ja pravioŭ u karancinie 14 dzion. U mianie karanavirusa niama, ale ŭ adnaho z kaleh analiz akazaŭsia pazityŭnym. Jaki jaho stan, jak lečać — na žal, hetaj infarmacyi ja nie maju.

Ciapier budu viartacca na pracu. Bolšaść palotaŭ admianili, heta adabjecca na zarobku. U bortpravadnika zarobak — heta mizerny akład plus dapłata za hadziny, jakija nalataješ.

Ale na pracy kažuć, što na hoły akład nikoha nie pasadziać, rejsy buduć raźmiarkoŭvać pamiž supracoŭnikami. Umoŭna kažučy, kab kožny nalataŭ hadzin pa 40, i chacia b pa pałovie zarobku zmahli atrymać usie.

Ciapier trochi strašna, kaniečnie, bo žyvu nie adzin, z baćkami. Kali pačnucca paloty, to, napeŭna, budu šukać časovaje žyllo i źjedu, bo pracuju ź ludźmi i nie chaču zarazić baćkoŭ».

• 0
• 0
• 0
• 0
• 0
• 0
• 0
• 0