Jašče adna žančyna ź Viciebska śćviardžaje, što jaje mama pamierła ad karanavirusnaj pnieŭmanii
«U mianie mama pamierła tut ad karanavirusa. Učora [30 sakavika] pamierła, a 5-aj hadzinie niedzie. Dva tydni jana tut lažała. Raźviłasia pnieŭmanija. Jana dychała pieršapačatkova, a potym pierastała dychać. Joj uklučyli hety aparat štučnaha dychańnia», — raskazała «Biełsatu» Natalla Čepik, dačka pamierłaj Alaksandry Čepik.
31 sakavika tamsama, u Čyhunačnaj balnicy, pamior zasłužany artyst Biełarusi Viktar Daškievič, jakoha ŭłady pryznali adzinym pamierłym nośbitam karanavirusnaj infiekcyi.
73-hadovaja Alaksandra Čepik była na piensii i nie pakidała miežaŭ Biełarusi.
Pieršaj u siamji zachvareła sama Natalla. Jana kaža, što taksama nikudy ź Biełarusi nie vyjazdžała, adnak zachvareła na prastudu i 5 sutak adlažała z tempieraturaj, paśla čaho jaje pakłali ŭ Tubdyspanser na 10 dzion.
«Jany [miedyki] skazali: virus. U Minsk adpraŭlali mazki i nie paćvierdzili [COVID-19]. Jak prastuda. U mianie potym kašal pačaŭsia niepryjemny. Vielmi mocny. Suchi. Ty kašlaješ, i ŭsio cieła skača i skača ad taho, što razdražniaje tak. Nastolki niepryjemna», — apisvaje simptomy svajoj chvaroby Natalla Čepik.
U hety ž čas adčuła siabie chvoraj i maci Natalli, adnak u balnicu, pavodle dački, jana lahła nie adrazu: «Jana adrazu była ŭdoma, ale, kali mianie zabirali, u jaje ŭžo tempieratura była. Ja dumaju, čamu jana nie pajechała? Ja joj kazała: davaj pajedziem… Viedajecie, našy ludzi ŭsio na pazityvie — nas heta nie datyčyć. A potym akazvajecca…»
U vyniku ŭ žančyny raźviłasia pnieŭmanija, praź jakuju jaje i pakłali ŭ Čyhunačnuju balnicu Viciebsku. 30 sakavika Alaksandry Čepik nie stała.
«Kazali, što heta karanavirus. Adrazu skazali: frahmient. Ja nie viedaju, čamu epidemijołah skazaŭ «frahmient», jak heta razumieć, — raskazvaje Natalla Čepik. — Ale potym ja pazvaniła siudy ŭ balnicu, jany skazali: Jaki frahmient? Karanavirus!» — śćviardžaje Natalla Čepik.
Natalla Čepik havoryć, što siońnia pamierłuju zavieźli ŭ abłasny morh, dzie buduć uskryvać i pisać zaklučeńnie.
Žančyna baicca, što ŭ zaklučeńni mohuć schavać fakt karanavirusa i tamu choča, kab pra hety vypadak daviedalisia ludzi.
Raniej svajaki inšaj žycharki Viciebska, 58-hadovaj Taćciany Chuziejevaj, raskazali «Našaj Nivie», što pamierłaja była špitalizavanaja ź pnieŭmanijaj i što svajakam pazvanili i paprasili samaizalavacca, skazali, što byŭ paćvierdžany karanavirus. Paśla Minzdaroŭja abvierh hetuju infarmacyju i zapeŭniŭ, što Covid-19 u vypadku Chuziejevaj nibyta nie mieŭ miesca.
Na žal, aficyjnaja infarmacyja pra kolkaść pacyjentaŭ z dyjahnazam «pnieŭmanija» ŭ Viciebsku i vobłaści nie publikujecca.
Hetaja abstanoŭka sakretnaści adroźnivaje Biełaruś ad inšych krain, jakija sutyknulisia z pandemijaj. U adroźnieńnie ad Rasii, Kazachstana, Polščy, Litvy dy inšych krain, infarmacyja pra kolkaść chvorych abviaščajecca nierehularna, abryvačna, časam navat u zahadkavaj, rebusnaj formie. U adroźnieńnie ad inšych krain, u Biełarusi nie publikujecca aficyjnaj infarmacyi pra hieahrafičnuju łakalizacyju vyjaŭlenych vypadkaŭ Covid-19, što daje padstavu dla roznych čutak. Minzdaroŭja tłumačyć taki padychod niežadańniem pravakavać paniku.
Pachavańnie Alaksandry Čepik maje adbycca zaŭtra. Mahčyma, zaŭtra Ministerstva achovy zdaroŭja patłumačyć bolš pra jaje śmierć. Varta adznačyć, što siońnia Minzdaroŭja navat nie apublikavała aficyjnuju ličbu infikavanych karanavirusam.
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia5
Kamientary