Prysud pryvatnamu siektaru

Pavodle novaha hienpłanu raźvićcia stalicy ŭ miežach kalcavoj miesca dla pryvatnaha siektaru amal nie budzie.

Papiaredni hienieralny płan raźvićcia Minsku byŭ pryniaty šeść hadoŭ tamu. Za hety čas jon sastareŭ, i pryjšłosia składać novy. Praca jašče praciahvajecca. Prajekt čakaje ŭzhadnieńnia z roznymi municypalnymi strukturami i zaćvierdžańnia ekśpiertaŭ.

Navinak u im chapaje.

Raspracoŭščyki chočuć pavialičyć terytoryju Minsku bolš čym u paŭtara razu, vynieści ź miežaŭ horadu bolšaść zavodaŭ…

Pa‑pieršaje, heta budaŭnictva trasy ŭ abychod Minsku, jakaja źviaža vilenski i kijeŭski kirunki. Žyćcio viosak, kala jakich pojdzie abchadnaja, źmienicca.

Druhaja prablema źviazanaja sa znosam pryvatnaha siektaru. Raniejšy (jašče dziejsny) hienpłan praduhledžvaŭ častkovaje zachavańnie pryvatnych damoŭ i navat budaŭnictva novych, ciapier ad takoj idei vyrašana admovicca. Minsku pahražaje masavaje pierasialeńnie pryvatnaha siektaru. Raspracoŭščyki abiacajuć, što heta nie zakranie elitnyja rajony z sučasnymi katedžami. Sapraŭdy, było b dziŭna, kab na miescy Drazdoŭ z rezidencyjaj Łukašenki byŭ zapłanavany šmatpaviarchovy dom dla čarhovych ilhotnikaŭ. Nieelitnym žycharam možna rychtavacca da najhoršaha varyjantu. Praŭda, kali ŭzhadać, ź jakim verchałam rujnavalisia damy ŭ rajonie budaŭnictva mietro, jak ludzi abaraniali svaje kvatery na vulicy Marksa, možna zrazumieć, što znos pryvatnaha siektaru stanie hłabalnaj prablemaj dla staličnych uładaŭ.

Blizkaja da papiaredniaj i ideja budaŭnitva treciaha transpartnaha koła. Praŭda, kołam prajektavanuju trasu možna nazvać ź vialikaj naciažkaj. Trasa, jakaja abapirajecca na ŭžo pabudavanyja vulicy Hareckaha, Alibiehava, Malinina, Radyjalnuju i šerah inšych, usio roŭna zachopić i pryvatny siektar u Kurasoŭščynie, Łošycy, Zialonym Łuzie. Ale chto mienavita stanie achviaraj novaha budaŭnictva i kali žycharoŭ prainfarmujuć pra novyja idei staličnych kiraŭnikoŭ — pytańnie zastajecca adkrytym.

U prajekcie hienpłanu nie prapisana nijakaj kankretyki: nichto nie moža dać harantyi, što jon nie budzie znoŭ pierahladacca. Kiraŭnik Minharvykankamu Michaił Paŭłaŭ navat rekamiendavaŭ unosić dapaŭnieńni i źmianieńni kožnyja dva hady. Całkam mažliva, što inšy mer ci inšyja prajekciroŭščyki pačnuć pravodzić supraćlehłuju palityku i, naprykład, zaachvočvać budaŭnictva pryvatnych katedžaŭ.

• 0
• 0
• 0
• 0
• 0
• 0
• 0
• 0