Bresckaja kandydatka ŭ televystupie nazvała Łukašenku dyktataram. I jaje źniali z vybaraŭ VIDEA
Kandydatka ŭ deputaty Palina Šarenda-Panasiuk raskrytykavała ŭ teleefiry palityku Alaksandra Łukašenki i nazvała jaho dyktataram. Vystup pakazali 21 kastryčnika na telekanale «Biełaruś-3». A praź dzień kandydatku źniali z vybaraŭ.
«Učora ja jašče zapisałasia na radyjo, siońnia miełasia zanieści tudy svaju pieradvybarčuju prahramu. Ale mianie zaprasili na pasiadžeńnie kamisii. Pakolki była zaniata svajoj prahramaj, adpraviła svaju davieranuju asobu. Tam byŭ razyhrany marlezonski balet i skazana, što mianie zdymajuć. Pryčynaj nazvali toje, što ŭ vystupie pa telebačańni ja zaklikała da źviaržeńnia ŭłady, zryvu vybaraŭ, što byŭ paklop na prezidenta.
Kamisija była prosta ŭ šalenstvie. Ja tak razumieju, ź Minsku na ich nacisnuli: maŭlaŭ, što heta ŭ vas tut robicca», — raskazała «Našaj Nivie» Palina Šarenda-Panasiuk, jakaja vyłučałasia pa Bresckaj-Zachodniaj vybarčaj akruzie №1.
Vystupy niekatorych kandydataŭ u deputaty naohuł nie prapuścili na TB praz cenzuru. Jak atrymałasia, što tut efir adbyŭsia?
«Moj vystup byŭ adnym ź pieršych, i jany jašče, napeŭna, prosta nie paśpieli ŭklučyć usie svaje filtry, — miarkuje palityk. — Ja tekst papiarednie prynosiła na fłešcy. Rabotniki TB litaralna za siekundu pierad zapisam prybiehli z razdrukavanym vystupam. Aburalisia słovu «dyktatar», maŭlaŭ, što heta paklop, abraza. Ja tłumačyła, što heta palitałahičny termin».
Na vybarach kandydatka pradstaŭlaje hramadzianskuju kampaniju «Jeŭrapiejskaja Biełaruś».
Jana kaža, što budzie abskardžvać rašeńnie kamisii.
«Heta poŭnaja prajava dyktatury, što čałavieka zdymajuć za toje, što jon krytyčna vykazvajecca pra siońniašniaje žyćcio ŭ Biełarusi. Heta ŭ pryncypie narmalna dla luboj krainy, kali padčas vybaraŭ aktyvizujecca palityčnaje žyćcio. Ničoha tut niama kryminalnaha», — dzielicca žančyna.
Ciapier čytajuć
Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ1
Kamientary