Łušč, Ahafonaŭ, Mirsalimava — «ruski śviet» pasprabuje praleźci ŭ parłamient

Staršynia ruchu «Hramadzianskaja zhoda» Arciom Ahafonaŭ abviaściŭ ab svaim rašeńni bałatavacca ŭ Pałatu pradstaŭnikoŭ. Ahafonaŭ pojdzie pa Asipovickaj vybarčaj akruzie.

Pavialičyć

Chto taki Ahafonaŭ? Aktyvist naradziŭsia ŭ 1976 hodzie ŭ horadzie Zajsan na kazachstanska-kitajskaj miažy. U Biełaruś pierabraŭsia ŭ 1996 hodzie. Žyŭ u Słaŭharadzie, paśla ŭ Asipovičach. Byŭ aktyvistam Abjadnanaj hramadzianskaj partyi, navat uznačalvaŭ Minskuju abłasnuju arhanizacyju, uvachodziŭ u kamandu Jarasłava Ramančuka. Pierałom u śviadomaści Ahafonava adbyŭsia paśla padziej u Krymie i ŭschodzie Ukrainy, kali jon padtrymaŭ rasijskuju ahresiju.

Z taho času jon adzin z aktyŭnych prychilnikaŭ «ruskaha śvietu» ŭ Biełarusi.

«Moj ruski śviet — uva mnie. Jon pryjšoŭ tudy z kałychanki, jakuju mama śpiavała na ruskaj movie, ź luboŭju da rodnaj pryrody, z razumieńniem siabie spadčyńnikam ruskaj kultury i ruskaj cyvilizacyi, jakija ja i majo pakaleńnie pavinny raźvić i pieradać naščadkam», — tak pisaŭ Ahafonaŭ.

U pačatku 2017 hoda Ahafonaŭ razam z achoŭnikam Jaŭhienam Kanstancinavym (viadomy pa mutnaj historyi z navapołackim ślesaram Andrejem Hajdukovym, jakoha abvinavačvali ŭ špijanažy) zasnavali ruch «Hramadzianskaja zhoda». Mabyć, ličyli, što praz strukturavanuju arhanizacyju budzie praściej atrymać padtrymku z boku Maskvy.

Na siońnia Kanstancinaŭ bolš nie źjaŭlajecca sustaršynioj arhanizacyi. Pa infarmacyi «NN», jany nie syšlisia z Ahafonavym praz staŭleńnie da savieckaj spadčyny. Ahafonaŭ razhladaje čas SSSR jak pieryjad, jaki nie pavinien być vodaraździelnym miž ludźmi padobnych pohladaŭ, u Kanstancinava ž inšaja pazicyja, jon ličyć SSSR niesvabodnaj dziaržavaj i krytykuje toj čas.

Čamu Ahafonaŭ idzie ŭ deputaty? «Ja dastatkova daŭno ŭ palitycy. Udzieł u vybarach — adna z hałoŭnych padziejaŭ u kalendary luboha palityka. Heta dazvalaje trymać ruku na pulsie padziej, mieć bolš ščylny kantakt ź ludźmi. Plus da ŭsiaho — heta mahčymaść danosić pazicyju našaj struktury», — skazaŭ «NN» Ahafonaŭ.

Arciom Ahafonaŭ — nie adziny vyłučeniec ad «Hramadzianskaj zhody». U Viciebsku pra svoj namier bałatavacca zajaviła Elvira Mirsalimava. Pohlady Mirsalimavaj jašče bolš adyjoznyja, čym u taho ž Ahafonava.

Pavialičyć

Naprykład, jana ličyć, što «nacyjanalisty ckujuć rodnuju dla biełaruskich hramadzian ruskuju movu». Dadaje, što «nacyjanalizm — heta krok da straty suviereniteta». A jašče Mirsalimava adkrytaja prychilnica Stalina.

Baćka Mirsalimavaj Eldar rodam z Rasii, ale pierajechaŭ pracavać u Biełaruś.

Mirsalimava źjaŭlajecca arhanizatarkaj «Bieśśmiarotnaha pałka» ŭ Viciebsku. Heta takaja akcyja, jakuju stała vykarystoŭvać rasijskaha prapahanda ŭ metach demanstracyi pieravahaŭ «ruskaha śvietu». Taksama Elvira biare ŭdzieł u cmianych arhanizacyjach nakštałt ruchu «Sajuz», jaki zasnavaŭ rasijski palityk-aŭtsajdar Siarhiej Baburyn.

Pavialičyć

«NN» źviartałasia da spadaryni Mirsalimavaj z prośbaj pra intervju nakont jaje ŭdziełu ŭ vybarach, ale atrymała admovu.

Pa niekatorych źviestkach, Ahafonaŭ i Mirsalimava płanavali vyłučacca ad kišennaj Partyi pracy i spraviadlivaści (PPS), jakuju ŭznačalvaje Vasil Zadniaprany.

Zadniapranaha navat deputat-«kazak» Mikałaj Ułachovič abvinavačvaŭ, što toj źjaŭlajecca častkaj «ruskaha śvietu» ŭ Biełarusi.

Darečy, asobu Zadniapranaha na minułych parłamienckich vybarach aktyŭna padtrymlivaŭ «baciuška sa svastykaj» Kanstancin Burykin. Ulotki Zadniapranaha navat byli raźviešany ŭ carkvie ŭ Hatavie.

Ahafonaŭ paćvierdziŭ «NN», što padavaŭ zajavu na ŭstupleńnie ŭ PPS, ale nie viedaje, ci jaje zadavolili. Jon abviarhaje infarmacyju, što budzie bałatavacca ad hetaj palityčnaj siły. «Ja pajdu jak niezaležny kandydat», — skazaŭ jon «NN». Ci budzie jon siabie pazicyjanavać jak prarasijski palityk? «Jak prychilnik družby z Rasijaj», — raskazaŭ Ahafonaŭ.

Pa infarmacyi «NN», sapraŭdy płanavałasia, što Ahafonaŭ i Mirsalimava buduć vyłučanyja ad PPS, ale partyja ci to sama pieradumała, ci to «pieradumali» za jaje.

Toje, što arhanizacyi Zadniapranaha blizkija pohlady Ahafonava i Mirsalimavaj, možna mierkavać chacia b sa staronki partyi Ukantakcie. Tam aktyŭna pierapoščvajuć supołku «Adekvatny Viciebsk», stvorany prychilnikami «ruskaha śvietu».

Taksama jość vialikaja imaviernaść, što na vybarach budzie bałatavacca kiraŭnik arhanizacyi «Rumoł» (Ruś maładaja) Siarhiej Łušč. U minułym jon prytrymlivaŭsia nieapahanskich i nieanacysckich pohladaŭ, źjaŭlaŭsia vołchvam antysiemickaj siekty «Jež schron słavien». Praź niejki čas Łušč pierafarbavaŭsia i staŭ prasoŭvać intaresy Rasii ŭ našaj krainy, razdavać na 9 Maja hieorhijeŭski stužki, iści ŭ pieršych šerahach u šeści «Bieśśmiarotnaha pałka».

Łušč pakul publična nie abviaščaŭ pra svoj namier bałatavacca. Budzie cikava panazirać, ci projdzie etap rehistracyi choć chtości ź niešmatlikich prychilnikaŭ «ruskaha śvietu».

Parłamienckija vybary majuć adbycca 17 listapada.

• 0
• 0
• 0
• 0
• 0
• 0
• 0
• 0