«Tbilisoba» projdzie ŭ Minsku ŭ subotu, 24 žniŭnia. Fiestyval praviaduć u Vierchnim horadzie, zavieršyć jaho adkryty kancert hurta Mgzavrebi. Pa tradycyi, hruzinskija pieśni buduć hučać sa sceny ŭ histaryčnym centry Minska ad paŭdnia i da paŭnočy. Kab pryvieźci ŭsich muzykaŭ, jakija vystupiać na scenie ŭ hety dzień, zamiest zvyčajnaha rejsavaha «Embraera» ŭ Biełaruś z Hruzii ŭ hety dzień prylacić bolš jomisty «Boinh».
Samaja pieršaja «Tbilisoba» prajšła piać hadoŭ tamu i tak spadabałasia mienčukam, što ź jaje pačałasia čarada dzion nacyjanalnych kultur u Vierchnim horadzie. Hruzinski fiestyval zastajecca samym papularnym siarod žycharoŭ horada i turystaŭ: u minułym hodzie na śviata pryjšło kala 80 tysiač čałaviek. Jubilejnaja piataja «Tbilisoba» projdzie pad słohanam «Śviata z hruzinska-biełaruskim charaktaram» i budzie pryśviečana siabroŭstvu dvuch narodaŭ.
«Charaktar — toje ŭnikalnaje, što ŭłaściva kožnamu z nas i dazvalaje adčuć siabie asablivym. U biełarusaŭ i hruzin šmat padobnych rys charaktaru, ale hałoŭnaje, što nas abjadnoŭvaje — heta haścinnaść, — kaža Dzianis Krupiec, dyrektar IDS Borjomi Belarus i arhanizatar festu. — My ŭsich zaprašajem u histaryčny centr Minska ŭ pieradapošniuju subotu žniŭnia. Tut budzie šmat hruzinskaj muzyki, tancaŭ, ježy i napojaŭ, usiaho taho, što adroźnivaje hetuju krainu ad usich inšych. Pakolki na «Tbilisobu» zvyčajna pryjazdžaje niamała haściej z Hruzii, upieršyniu ŭ hetym hodzie my pakažam taksama asablivaści biełaruskaj kultury. Naprykład, muzyčnaja prahrama budzie ŭklučać vystupy samych charakternych artystaŭ z abiedźviuch krain». Mgzavrebi — adzin z samych zapatrabavanych hruzinskich kalektyvaŭ prosta ciapier. Jany ŭžo źbirali ŭ Minsku anšłahi na zakrytych placoŭkach, a niadaŭna pabyvali ŭ haściach u «Viečarovaha Urhanta». Razam z Mgzavrebi ŭ Biełaruś lacić mužčynskaje šmathałośsie «Švidkaca», jakoje tak zachapiła Anhiełu Mierkiel padčas jaje niadaŭniaha vizitu ŭ Tbilisi, a taksama ŭładalnik pieršaj premii sioletniaha «Słavianskaha bazaru» Hieorhij Putkaradze — u minułym miesiacy batumiec litaralna parvaŭ zału viciebskaha amfiteatra trekam «Niebiaśpiečna» biełaruskich rokieraŭ Nizkiz. Artysty prylaciać pramym rejsam «Biełavija».
Fudkort hruzinska-biełaruskaha fiestyvalu zojmie ŭsiu terytoryju Vierchniaha horada, ad Ratušy da nabiarežnaj Śvisłačy. Da miascovych kafe i restaranaŭ arhanizatary płanujuć dadać kala 30 punktaŭ hramadskaha charčavańnia. Za čas, pakul u Minsku pravodzicca «Tbilisoba», hruzinskaja kuchnia stała vielmi papularnaj u horadzie — kolkaść nacyjanalnych restaranaŭ vyrasła ŭ niekalki razoŭ. Jany pryhatujuć na śviacie chinkali, chačapury i charčo.
Źjavicca na fiestyvali i tancplacoŭka, dzie razhorniecca batł pamiž tancam «Mciułury», lavonichaj, voham, chip-chopam i kantemparary. Dla tych, kamu zachočacca aktyŭnaha adpačynku, «Baržomi» arhanizuje aktyŭ-park. Dla maleńkich haściej budzie pracavać dziciačy haradok.
Na fiestyvali ŭpieršyniu budzie biełaruskaja placoŭka, dzie haściej z soniečnaj Hruzii navučać biełaruskaj movie. Pravodzić uroki budzie «Art-Siadziba»: kamanda arhanizacyi padrychtuje śpiecyjalnyja pazły sa słovami na ruskaj, biełaruskaj i hruzinskaj movach. Hruzinaŭ navučać kazać «pryvitańnie», «kali łaska», «vałoška», raskažuć, jak zamović sabie abied u biełaruskim restaranie i jak vyviedać darohu da Nacyjanalnaj biblijateki. Hetaja aktyŭnaść budzie dastupnaja i dla samich biełarusaŭ, jakim nahadajuć, jak prahavaryć važnyja frazy na rodnaj movie, a taksama raskažuć, jak jany hučać pa-hruzinsku.
Arhanizatary fiestyvalu — TM «Baržomi», Minharvykankam, meryja Tbilisi, Pasolstva Hruzii ŭ Respublicy Biełaruś i hruzinskaje kulturna-aśvietnickaje tavarystva «Mamuli».
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia6
Kamientary