Takuju Biełaruś vy jašče nie bačyli: virtualnaje padarožža pa Błakitnych aziorach i Naračanskim parku FOTY i PANARAMY
Časta davodzicca čuć ad ludziej, što na voziery Narač ničoha cikavaha niama — kupacca niazručna, bierahi zabudavanyja sumnymi sanatoryjami, servis — uzroŭniu 80-ch hadoŭ minułaha stahodździa. Ale nacyjanalny park «Naračanski» — heta daloka nie tolki samaje vialikaje voziera Biełarusi, a jašče i ŭnikalnaja pryrodnaja terytoryja, jakaja raskinułasia ad Miadzieła da Śviry i Łyntupaŭ. Nad joj my zaraz i zrobim nievialikaje virtualnaje padarožža.
Na samym zachadzie nacyjanalnaha parka siarod krutych pierapadaŭ reljefu raskinulisia znakamityja Błakitnyja aziory. Kali hulać tam pa lesie, to kruty padjom adrazu źmianiajecca krutym spuskam, a ŭnizie — voziera. Zatym iznoŭ kruty padjom — i iznoŭ voziera. Tolki budźcie ŭvažlivymi: značnaja častka hetaj terytoryi adnosicca da zapaviednaj zony, kudy nie pavinna stupać naha čałavieka. Pierad vandroŭkaj abaviazkova pahladzicie kartu.
Samaje vialikaje z hetych azior — tajamničy Bałduk, čyja hłybinia dasiahaje amal 40 mietraŭ! Vada ŭ voziery vielmi prazrystaja, ale nadzvyčaj adčuvalnaja da dziejnaści čałavieka z-za słabaj pratočnaści voziera: pieryjad źmieny vady składaje amal 30 hod.
Błakitnyja aziory pierarazaje raka Strača. Časam jana chavajecca ŭ hłybokaj dalinie, časam pierabiahaje praz parohi i pierakaty. Raku daŭno lubiać bajdaračniki, spłaŭ pa joj zaŭsiody prynosić šmat uražańniaŭ.
Z Błakitnych azioraŭ my pieraniasiemsia na voziera Miadzieł. Nie zadumvalisia nikoli, čamu rajcentr Miadzieł znachodzicca la voziera Miastra, a adnajmiennaje voziera raźmieščana ŭ 10 kiłamietrach na poŭnač? Na samaj spravie, pieršapačatkova horad uźnik u Ch-CHI stahodździ jakraz na samym vialikim z astravoŭ voziera Miadzieł. Ciapier hety vostraŭ nosić nazvu Zamak. Jon usiaho paŭkiłamietra ŭ dyjamietry, a ŭ jaho paŭdniova-uschodniaj častcy dahetul možna adšukać haradzišča sa stromkimi schiłami. Mienavita tut stajaŭ draŭlany zamak i adsiul pačałasia historyja horada Miadzieł.
U centry vostrava staić vialiki kryž
Voś jano — miesca, dzie stajaŭ pieršy draŭlany Miadzielski zamak
I tolki ŭ XV stahodździ pa nieviadomych pryčynach (historyki miarkujuć, što heta była epidemija) horad byŭ pieraniesieny na vostraŭ (ciapier paŭvostraŭ) na voziery Miastra. Siońnia ciažka zdahadacca, što na tym nievialikim parosłym drevami ŭzvyššy la ciapierašniaha rajcentra niekali žyli ludzi, ale raniej na hetym miescy stajaŭ vialiki muravany zamak ź viežaj, pałacam i mahutnymi murami da dvuch mietraŭ taŭščynioj. U ziamli da siońniašniaha dnia zachavalisia sutareńni sa sklapieńniami i leśvicami, ale źniešni vyhlad tahačasnaha zamka možna ŭjavić tolki pryblizna.
Heta i jość miesca, dzie stajaŭ muravany zamak la sučasnaha Miadzieła
Naračanski nacyjanalny park — heta nie tolki aziory Narač, Miadzieł i Miastra — usiaho ich tut bolš za 30. Naprykład, vielmi cikavaje ciesnaje trya ŭtvarajuć aziory Łotviny, Rasochi i Chodasy. Kali spynicca na turystyčnaj stajancy, što znachodzicca na pahorku pamiž aziorami, to vada budzie akružać vas z usich bakoŭ. Vid adtul nievierahodny!
Deputatka, jakaja rychtuje pryhažuń dla Łukašenki, vyjšła zamuž23
Kamientary