Technałohii manipulacyi

Nielha zabyvacca, što za kožnym pravakacyjnym vykazvańniem moža chavacca i ruka specsłužbaŭ. Piša Franak Viačorka.

Kuba...

Siaredni košt kamputara na Kubie — 500—600 dalaraŭ, što raŭniajecca 30 (tryccaci) siarednim miesiačnym zarobkam. Dostup da internetu majuć zabiaśpiečanyja kubincy, jak praviła, nielehalnyja kamersanty, ludzi z ułady ci specsłužbaŭ, a taksama studenty VNU.

Prykładna ŭ 2005 hodzie ź inicyjatyvy Kamunistyčnaj partyi Kuby, specsłužbaŭ i, vierahodna, Ministerstva zamiežnych spravaŭ była ŭtvorana hrupa tak zvanaja hrupa «Praŭda». U jaje skład byli nabranyja niekalki socień čałaviek, balšynia — maładyja «kamunisty», jakija vałodajuć niekalkimi zamiežnymi movami, z Universytetu infarmatyki i inšych techničnych VNU. Ludzi atrymoŭvajuć nieabmiežavany dostup da internetu, kamputar, pavyšanuju stypendyju. Ad ich patrabujecca siadzieć u internecie, adsočvać usiu infarmacyju, jakaja moža naškodzić imidžu «utapičnaha kamunizmu» na Kubie. Jany musiać rehistravacca na forumach, čatach, dyskusijnych doškach, ananimna ci pad vydumanymi imionami i vieści dyskusiju, abaraniajučy vyhodnuju pazycyju partyi i jaje lideram Fidelu i Raulu Kastram. Jość śviedčańni, što aktyvisty hrupy «Praŭda» ŭdavali siabie kubinskimi apazycyjanerami z metaj atrymańnia zasakrečanaj infarmacyi, jakaja paśla pieradavałasia specsłužbam.

Isnavańnie hrupy «Praŭda» dahetul nie atrymała paćviardžeńnia aficyjnych ustanovaŭ Kuby. Ale adzin ź lideraŭ demakratyčnaha ruchu Kuby Raberta de Miranda, a taksama moj siabra, lider Liberalnaha moładzievaha sajuza Kuby Jury Peres pierakananyja, što hetaja hrupa isnuje.

...Biełaruś?

U2005—2006 hodzie biełaruskija ŭłady ŭzialisia za internet. Prajšła infarmacyja, što ŭ Kitaja byli zakupleny filtry internet‑trafiku dla ažyćciaŭleńnia cenzury. Užo tady pačałasia dyskusija nakont kantrolu internetu z boku dziaržavy. Vierahodna, była stvoranaja hrupa, padobnaja kubinskaj «Praŭdzie».

Mienavita paru hod nazad biełaruskija infarmacyjnyja resursy ŭviali mahčymaść kamentavańnia navinaŭ internet‑karystalnikami, papularnaść atrymali błohi. Usie hetyja technalohii dazvalajuć vykazvacca kožnamu achvotnamu bieź nieabchodnaści paznačać sapraŭdnyja asabistyja dadzienyja. Za hety čas pastajannyja karystalniki sieciva ŭžo vyličyli niekalki tuzinaŭ tak zvanych «trolaŭ» (jany ž «łukaboty», jany ž «dupalizy»). Jany źjaŭlajucca na forumach partału TUT.by, jany aktyŭna kamentujuć naviny na svaboda.org, nn.by. Jany viaduć žyvyja dziońniki (livejournal.com), ale čaściej za ŭsio vykarystoŭvajuć ich dziela pravakacyjaŭ dy inśpiravańnia dyskusii u patrebnym łukašenkaŭskaj prapahandzie klučy. Niaredka heta prymianiajecca ŭ dačynieńni da pradstaŭnikoŭ demakratyčnaha ruchu.

Biezumoŭna, nie pavinna być palavańnia na viedźmaŭ, što voś toj hebist, a toj prosta durań. Siarod internet‑karystalnikaŭ — ludzi roznych uzrostaŭ, pohladaŭ i sacyjalnych statusaŭ. Dla mnohich udzieł u infarmacyjnych hulniach — zabava. Ale nielha zabyvacca, što za kožnym pravakacyjnym vykazvańniem moža chavacca i ruka specsłužbaŭ. Nie paličycie za paranoju.

• 0
• 0
• 0
• 0
• 0
• 0
• 0
• 0