U Minsku pry padzieńni z vyšyni paciarpieŭ sałdat terminovaj słužby na terytoryi vajskovaj častki. 21-hadovy minčanin Andrej Makajed prachodzić słužbu ŭ 120-j hvardziejskaj asobnaj miechanizavanaj bryhadzie. Maci paciarpiełaha sałdata raspaviała TUT.BY pra stan zdaroŭja syna.
— Mnie ŭčora kala 13.40 patelefanavaŭ plamieńnik Maksim i paviedamiŭ, što Andreja skinuli z 4-ha paviercha (budynka na terytoryi vajskovaj častki. Zaŭvaha. Red.), I što jon ciapier znachodzicca ŭ reanimacyi, — raspaviadaje Natalla, maci paciarpiełaha Andreja. — Chtości mnie jašče patelefanavaŭ, ja ŭžo nie pamiataju. U toj momant ja znachodziłasia ŭ Salihorsku, my pražyvajem u Minsku. Ja pryjechała na Mašerava, 26 u vajenny špital, mianie sustreli lekary. Jany paćvierdzili, što dzicia ŭ stabilna ciažkim stanie. Praviedziena składanaja apieracyja, lekary zmahajucca za jaho žyćcio. Andreju vydalili častku padstraŭnikavaj załozy i całkam sielazionku. Jon znachodzicca ŭ miedykamientoznaj komie.
Natalla była ŭ špitali i siońnia, i ŭčora. Pavodle jaje słoŭ, Andreja znajšli nieprytomnym sałdaty, što išli mima.
— Jany pasprabavali jaho abudzić, ale nie zmahli. Sałdaty panieśli na rukach Andreja ŭ miedčastku. Užo adtul jaho pahruzili ŭ mašynu i zavieźli ŭ vajskovy špital, — kaža žančyna. — Tym časam vajskovaja častka nie daje nijakaj infarmacyi, i błytajuć roznyja viersii. Chtości ničoha nie kaža, chtości nie viedaje patrebnych telefonaŭ. Tolki prabačeńni prynosiać, i kali patrebna niejkaja dapamoha, to kažuć źviartacca. Ale heta i ŭsio ŭ pryncypie. U mianie takoje adčuvańnie, što jany prosta zamiatajuć ślady złačynstva niejkaha.
Natalla raspaviadaje, što «Andrej — vielmi spakojny, uraŭnavažany, u jaho ŭsiudy tolki stanoŭčyja charaktarystyki, u nas nikoli ź im nie było kanfliktaŭ». Pavodle jaje słoŭ, Andrej chacieŭ słužyć u vojsku. Chłopca pryzvali ŭ armiju vosieńniu minułaha hoda. Da hetaha jon niekalki miesiacaŭ prapracavaŭ hazaelektrazvarščykam na «Biełaruśkalii».
— U Andreja siarednieśpiecyjalnaja adukacyja. Spačatku jon vučyŭsia na jurysta, a zatym — na hazaelektrazvarščyka. Jon skončyŭ navučańnie z čyrvonym dypłomam, — kaža Natalla.
Žančyna raspaviadaje, što havaryła z synam pa telefonie za dzień da zdareńnia.
— Usio było dobra. Jon ni na što i ni na kaho nie skardziŭsia. Jon nikoli nie turbavaŭ mianie, pa-mužčynsku ŭsio vyrašaŭ samastojna. Jon kazaŭ, što z kožnaha momantu łović karyść. Ja ŭjavić nie mahu navat, što mahło takoje zdarycca…
Andrej vyras u šmatdzietnaj siamji, u jaho jość troje bratoŭ. Andrej — najstarejšy.
Natalla raspaviała, što siońnia da jaje pryjazdžaŭ adzin z namieśnikaŭ ministra abarony, a taksama adzin z tavaryšaŭ pa słužbie jaje syna.
U 432-m špitali paviedamili, što ŭčora da ich pastupiŭ Andrej Makajed, 1997 naradžeńnia. U miedycynskim kliničnym centry skazali, što chłopiec ciapier znachodzicca ŭ reanimacyi, jaho naviedvańnie zabaroniena - jak minimum bližejšy tydzień. Pra stan zdaroŭja Andreja rekamiendavali daviedvacca ŭ jaho rodnych.
U Minabarony raniej zajavili, što sumiesna sa Śledčym kamitetam vyśviatlajuć pryčyny atrymańnia traŭmy vajskoŭcam terminovaj vajennaj słužby. Traŭma atrymana ŭ vyniku padzieńnia z vyšyni, udakładnili ŭ Minabarony.
Kamientary