Što źmienicca va Ukrainie pry prezidencie Zialenskim

U nas u Biełarusi tut stali bajacca i malavać niejki apakalipsis va Ukrainie praź ichnija prezidenckija vybary. Na moj pohlad, absalutna biespadstaŭna. I absalutna nie važna, chto pieramoža, Zialenski ci Parašenka. Nie treba hladzieć na ŭkrainskija padziei praź biełaruskuju pryzmu.

1. Ukraina — nie supierprezidenckaja Biełaruś, dzie prezident car i boh u kožnym karoŭniku z aba****aj karovaj z zakarełaj šerściu. Heta navat nie prezidenckaja Francyja, dzie prezident pryznačaje premjera i źjaŭlajecca staršynioj Rady ministraŭ. Heta parłamiencka-prezidenckaja dziaržava.

Paŭnamoctvy prezidenta tam, u paraŭnańni ź Biełaruśsiu, vielmi abmiežavanyja, asabliva ŭ śfiery ŭnutranaj palityki. Kab hetuju ŭładu mieć, prezident pavinien mieć mocnuju parłamienckuju frakcyju. Vybary ŭ Radu buduć tolki vosieńniu. Ni Parašenka, ni Zialenski, chutčej za ŭsio, nie buduć mieć bolšaść — buduć niejkija kanfihuracyi kaalicyi.

2. Jak by heta dziŭna ni hučała, ale pierad Ukrainaj na siońnia niama ekzistencyjalnych pahroz. Tak, jość vajna na Uschodzie, jość pytańnie Kryma, ale samomu isnavańniu ŭkrainskaj dziaržaŭnaści, jak u 2014 hodzie, na siońnia ničoha nie pahražaje.

Kryki amataraŭ Parašenki, što pry prezidencie Zialenskim Ukraina razvalicca, jak i kryki amataraŭ Zialenskaha, što druhoha terminu Parašenki Ukraina nie pieražyvie — zvyčajnaja pieradvybarčaja manipulacyja. Heta nam ź Biełarusi ŭkrainskaja sistema zdajecca chaatyčnaj i anarchičnaj. Ale, jak heta ni paradaksalna, jana bolš ustojlivaja, čym naša aŭtarytarnaja biełaruskaja. Biełaruskaja sistema — heta taburetka z tryma nožkami, dźvie ź jakich pałamanyja, jana trymajecca na adnoj nazie. Ukrainskaja ž «taburetka» choć i maje pačvarny vyhlad, ale maje šmat «nožak» u vyhladzie svabodnych i demakratyčnych vybaraŭ, chaj aliharchičnych, ale mocnych nacyjanalnych miedyja, chaj hrantajedskich, ale ŭpłyvovych hramadskich arhanizacyj, mocnych studenckich ruchaŭ, miascovych decentralizavanych hramad, što ŭźnikli padčas paśpiachovaj reformy miascovaha samakiravańnia i h.d.

Ukrainskaja sistema strymlivańnia i procivah pa jeŭrapiejskich mierkach nieefiektyŭnaja, pačvarnaja, źleplenaja śpiecham z hliny, h***a i pałak, ale jana isnuje. Tak, ukrainskaja dziaržava nieefiektyŭnaja, tam niama narmalnych sudoŭ i prafiesijnaj biurakratyi, ale sama łohika pryniaćcia rašeńniaŭ — demakratyčnaja, tam vialikaja kolkaść zacikaŭlenych asob i stejkchołdaraŭ, jano vyhladaje vielmi hruvastka, tamu nam u Biełarusi i zdajecca, što heta niejki «bardak». Ale heta demakratyja. Ubohaja, aliharchičnaja, va ŭkrainskim vykanańni, ale demakratyja.

U Biełarusi, dzie ŭsio krucicca vakoł adnaho čałavieka, i takoha niama. Tamu nijakich asablivych źmienaŭ va ŭkrainskaj palitycy, asabliva źniešniaj, z novym prezidentam, čakać nie varta.

3. Toje, što ciapier va Ukrainie niavažna, jakaja piersanalija budzie prezidentam, ja liču sapraŭdnym pośpiecham ukrainskaj palityčnaj sistemy. Jak i toje, što za ŭvieś čas pieradvybarčaj kampanii jaŭrejskaje pachodžańnie Zialenskaha nie tolki nie vykarystoŭvałasia ŭ kontrahitacyi — pytańnie nacyjanalnaści ŭvohule nie ŭzdymałasia padčas hetaj kampanii. Heta taksama važna.

4. Adzinaje, čaho varta ŭsurjoz pabojvacca ad Zialenskaha, što jon prypynić dziaržaŭnuju palityku padtrymki ŭkrainskaj movy. Vialikaja častka jaho vybarcaŭ z Poŭdnia i Uschodu ŭsprymajuć sučasnuju ŭkrainizacyju sa skiepsisam ci navat niehatyvam. Chacia pahladzim. Kučma i Janukovič taksama nie ŭmieli razmaŭlać pa-ŭkrainsku. Navučylisia. I navat nie zrabili rasiejskuju movu dziaržaŭnaj, jak abiacali. A Zialenski i hetaha nie abiacaje.

• 0
• 0
• 0
• 0
• 0
• 0
• 0
• 0