Piša Kastuś Šytal.
Na Paazierji dziaržaŭnyja pradpryjemstvy bankrutujuć adno za adnym. U navinach pišuć, što pačaty praces bankructva Pastaŭskaha pradpryjemstva mielijaracyjnych sietak.
Pierad tym u miastečku Varapajeva Pastaŭskaha rajona zbankrutavali adrazu dva pradpryjemstvy: drevaapracoŭčy kambinat i zavod žalezabietonnych vyrabaŭ. U miastečku, dzie žyvie mienš jak try tysiačy čałaviek, trysta čałaviek stracili pracu.
U miastečku Padśville Hłybockaha rajona, jakoje pa pamiery prykładna takoje ž, jak Varapajeva, zbankrutavali lnozavod i vinzavod.
U Hłybokim — RajPO i kansiervavy zavod.
Musili b zbankrutavać i mnohija pradpryjemstvy sielskaj haspadarki, ale dadzieny zahad nie pačynać praceduru ich bankructva. Tam zarobki zatrymlivajuć pa niekalki miesiacaŭ, i bolšaść haspadarak nie płacić unioski ŭ FSAN.
U «sytyja» hady mnohija chvalili ŭładu: maŭlaŭ, Łukašenka nie daŭ zakryć zavody, u ludziej jość praca. Tady ŭ stratnyja pradpryjemstvy ŭlivali hrošy, i adnačasova strymlivali raźvićcio pryvatnaj inicyjatyvy. Chto bačyŭ sutnaść pracesaŭ — razumieli, što rana ci pozna ŭsio heta laśniecca.
Kali nie stała dziaržaŭnaj padtrymki — usio pasypałasia. Rehijon dehraduje na vačach: mieniej pracoŭnych miescaŭ, mienšyja zarobki.
Vałavy rehijanalny pradukt na dušu nasielnictva ŭ Viciebskaj vobłaści bolš čym udvaja nižejšy, čym u Minsku — 7.620 rubloŭ suprać 16.931. VRP u vobłaści paśla kryzisu nie padniaŭsia navat da ŭzroŭniu 2015 hoda.
Moładź źjazdžaje, nasielnictva skaračajecca. Z maich adnakłaśnikaŭ u rehijonie zastałasia mienš jak pałova. Nasielnictva Dokšyckaha rajona skaraciłasia na 30% za dvanaccać hadoŭ.
Kamientary