Ułady paabiacali užo sioleta zabiaśpiečyć biełarusaŭ jakasnaj pitnoj vadoj na 95,6%

U Ministerstvie ŽKH paviedamili, što adnym z važnych kirunkaŭ u 2019 hodzie stanie pavyšeńnie jakaści pasłuh i kantrol za ich vykanańniem. U tym liku i praz udaskanalvańnie supracoŭnictva adzinaj słužby 115 na miescach z terytaryjalnymi orhanami ŭłady i zakazčykami kamunalnych pasłuh, piša Źviazda.

Elektrabojlery, indyvidualnyja ličylniki i žadańni ludziej

Zaćvierdžanyja Pastanovaj Saŭmina № 39 novyja ŭmovy kapitalnaha ramontu dazvolać vyrašyć prablemy ekspłuatacyi staroj zabudovy, ličać u Ministerstvie ŽKH.

— Možna budzie pazbavicca ad sastarełaha hazavaha abstalavańnia z adkrytaj kamieraj hareńnia, jakoje vykarystoŭvajecca dla padahrevu vady. Jaho zamieniać elektryčnyja bojlery, — raskazaŭ Andrej RAMAŠKA, načalnik upraŭleńnia žyllovaj haspadarki Ministerstva ŽKH. — Adnačasova heta dazvolić admovicca ad dymavych kanałaŭ i ich pravierak, što ŭ svaju čarhu sekanomić srodki hramadzian, a taksama źmienšyć ryzyku atručvańnia čadnym hazam. Možna adyści ad piačnoha aciapleńnia ŭ šmatkvaternych damach, dzie niemahčyma padvieści centralizavanaje aciapleńnie i haračaje vodazabieśpiačeńnie.

Uniesienyja Pastanovaj Saŭmina № 39 źmieny taksama pašyrajuć pieralik rabot, jakija možna vykonvać padčas kapramontu. Dapuskajecca pieraŭtvareńnie bałkona ŭ łodžyju, kali zvyčajny ramont kanstrukcyi niemetazhodny, abo ŭstanoŭka sistemy dystancyjnaha źjomu pakazčykaŭ z pryboraŭ indyvidualnaha ŭliku vady, hazu i ciapła. Pry hetym možna ramantavać ci abstaloŭvać sistemy dymavydaleńnia i recyrkulacyi ŭnutrydamavoj sistemy haračaha vodazabieśpiačeńnia.

Dziakujučy novaŭviadzieńniam da kapramontu mohuć dałučacca taksama tavarystvy ŭłaśnikaŭ i zabudoŭščyki. Praŭda, pry ŭmovie, što jany ŭnosili srodki na kapramont na rachunki miascovaj ułady abo ŭniasuć hetuju płatu. Jaje pamier raźličvajecca pa formule, jakaja ŭtrymlivajecca ŭ prajekcie, zaŭvažaje pradstaŭnik ministerstva:

— Pradstaŭlenaja formuła ŭličvaje pieryjady času dla raźliku płaty pa žyłych i niežyłych pamiaškańniach. A taksama kankretyzuje śpis rabot, jakija vykonvajucca pry kapitalnym ramoncie za košt biudžetu.

Darečy, ciapier jašče da prajektavańnia zadańnia na kapramont zakazčyk pavinien na ahulnym schodzie paviedamić žycharam pra vyniki ahladu ich doma i raboty, jakija majuć na im adbycca. Vyniki schodu fiksujucca ŭ pratakole, jaki i stanie padstavaj dla stvareńnia prajekta kapramontu i dadatkovych ramontnych rabot.

— Žycharam pavinny paviedamić pra nieabchodnaść ustanoŭki ŭ kvaterach pryboraŭ indyvidualnaha ŭliku raschodu vady, hazu, ciepła- i elektraenierhii. Prapanavać hramadzianam finansavać raboty pa ŭzmacnieńni i ŭciapleńni fasada, a taksama paviedamić pra inšyja mierapryjemstvy, jakija pavysiać enierhaefiektyŭnaść doma, — zaŭvažyŭ Andrej Ramaška.

Jakaść vady

Zabiaśpiečyć biełarusaŭ jakasnaj pitnoj vadoj na 95,6 % płanujuć sioleta, vykonvajučy dziaržprahramu «Kamfortnaje žyllo i spryjalnaje asiarodździe» na 2016—2020 hady.

A da 2025 hoda dastaŭku vady z naležnymi ŭłaścivaściami źbirajucca naładzić pa ŭsioj krainie.

Dla palapšeńnia jakaści vady ŭ najbližejšyja dva hady ŭ kožnaj vobłaści treba budavać nie mienš jak 40 stancyj abiezžalezvańnia za hod. Sioleta kraina atrymaje 258 takich abjektaŭ. Finansavać mierapryjemstvy płanujecca paroŭnu ź miascovych i respublikanskaha biudžetaŭ.

Jakasnaja pitnaja vada i efiektyŭnaja ačystka ściokavych vodaŭ — adna z pryjarytetnych zadač, kažuć u ministerstvie.

— Letaś u 14 nasielenych punktach vialisia raboty pa zakalcoŭcy i budaŭnictvie sietak vodazabieśpiačeńnia. Uviedziena ŭ ekspłuatacyju 41 stancyja abiezžalezvańnia, — raskazała Maryna TOŬŚCIK, načalnik upraŭleńnia kamunalnaj haspadarki i enierhietyki Ministerstva ŽKH. — U vyniku kala 60 tysiač čałaviek u haradach i haradskich pasiołkach i 110 tysiač sialčan zabiaśpiečany jakasnaj pitnoj vadoj.

Enierhietyčnaja niezaležnaść

U ministerstvie adznačyli, što dla raboty kacielnych, jak i raniej, pryjarytetnym zastajecca vykarystańnie miascovych vidaŭ paliva (MVP). Miascovyja vidy paliva, darečy, mienš za ŭsio vykarystoŭvajuć u Bresckaj i Minskaj abłaściach, a bolš za ŭsio kacielnych na MVP — u Viciebskaj.

— Pavieličeńnie vykarystańnia MVP — nie tolki enierhietyčnaja niezaležnaść ad impartujemych enierharesursaŭ, ale i adzin sa šlachoŭ da źnižeńnia sabiekoštu ciepłaenierhii. Jaje faktyčny sabiekošt na paliŭnych ščepkach — 90,2 rub./Hkał, na torfie — 79,7 rub./Hkał, na hazie — 99,8 rub./Hkał, — paviedamiŭ Andrej Sadoŭski. — Sumiesnaje ź Minenierha budaŭnictva kacielnych na torfie dazvalaje ŭvodzić u ekspłuatacyju sučasnyja enierhaefiektyŭnyja ciepłakrynicy, zachoŭvać rabočyja miescy i zahružać vytvorčyja mahutnaści torfabrykietnych zavodaŭ minimum na 20 hadoŭ.

U 2016—2018 hadach u sistemie ŽKH zapracavała piać kacielnych mahutnaściu 22,5 MVt na torfie, a ŭ najbližejšy čas padobnyja abjekty źjaviacca ŭ Stoŭbcach, Brasłavie, Krupkach, Słucku, Marjinaj Horcy.

Padtrymka ŭraźlivych katehoryj

Na padstavie Ukaza prezidenta № 225 pašyryŭsia pieralik tych, chto moža atrymlivać bieznajaŭnyja žyllovyja subsidyi dla apłaty kamunalnych pasłuh pa vyjaŭlalnym pryncypie (kali dziaržava sama naličvaje subsidyi, i čałavieku nie treba dakazvać niedachop u jaho hrošaj). Akramia piensijanieraŭ i invalidaŭ ciapier na heta majuć prava tyja, chto dahladaje dzicia da troch hadoŭ ci dzicia-invalida da

18 hadoŭ i atrymlivajuć adpaviednyja dapamohi. Toje ž samaje datyčycca hramadzian, jakija atrymlivajuć dapamohi pa dohladzie za invalidam I hrupy ci asobaj paśla 80 hadoŭ.

Takim čynam u krainie amal udvaja pavialičyłasia kolkaść siemjaŭ, jakim vydzielili bieznajaŭnyja žyllovyja subsidyi na apłatu kamunalnych pasłuh. Jašče ŭ 2017-m ich było 14,95 tysiačy, a ŭžo ŭ 2018-m — 30,8 tysiačy. Adpaviedna vyrasła i finansavańnie dziaržavaj takich hramadzian: z 744,3 tysiačy rubloŭ u 2017-m da 1148,6 tysiačy — letaś.

— Bieznajaŭnyja žyllovyja subsidyi dajucca najbolš uraźlivym katehoryjam hramadzian. Pryčym pa vyjaŭlalnym pryncypie ich atrymlivajuć 96 % siemjaŭ, — adznačyła Žanna Papučejeva, načalnik adździeła ŭpraŭleńnia ekanomiki Ministerstva ŽKH. — Pry hetym, niahledziačy na toje što ahulnaja suma subsidyj vyrasła, jaje pamier u pieraliku na asobnuju chatniuju haspadarku źmienšyŭsia.

Subsidyi vydzialajucca tym, chto addaje za «kamunałku» 20 % dachodu siamji ŭ horadzie i 15 % — na siale.

— Tolki 4 % hramadzian źviartajucca pa subsidyi sami. I heta śviedčyć, z adnaho boku, pra papularnaść i davier ludziej da hetaj mahčymaści. A z druhoha, pra toje, što kłopatam achopleny amal usie, chto maje patrebu, — zaŭvažajuć u ministerstvie.

Zakanadaŭčaje ŭdaskanalvańnie sistemy ŽKH, źnižeńnie sabiekoštu kamunalnych pasłuh, pošuk šlachoŭ enierhaefiektyŭnaści, indeksacyja taryfaŭ, jak i raniej, zakranuć sioleta žyllovuju haspadarku krainy.

• 0
• 0
• 0
• 0
• 0
• 0
• 0
• 0