Ad pryvatnych arhanizacyj znoŭ patrabujuć padpisku na dziaržaŭnyja haziety. Ideołah: «Tut niama ničoha kryminalnaha»
Adzin z čytačoŭ dasłaŭ u redakcyju «NN» pratakoł śniežańskaj narady ŭ staršyni Biarozaŭskaha rajvykankama Leanida Martyniuka.
Siarod inšych pytańniaŭ tam razhladałasia zabieśpiačeńnie padpiski na dziaržaŭnyja vydańni: «SB. Biełaruś siehodnia», «Respublika», «Narodnaja hazieta», «Sielskaja hazieta», «Znamia junosti», «7 dniej», «Zara», «Majak», «Źviazda».
U pratakole paznačany punkt №163 — «zabiaśpiečyć adnaŭleńnie tyražoŭ» hetych haziet. Jon źmiaščaje imiony adkaznych, jakija pavinny prakantralavać hety praces da 28 śniežnia 2018 hoda. Nastupny punkt zaklikaje pravieści aktyŭnuju padpisnuju kampaniju na 2019 hod.
Krynica raskazała «NN», što listy dasyłajuć pa elektronnaj pošcie navat u pryvatnyja arhanizacyi, patrabujučy dać spravazdaču pra praces padpiski da 22 śniežnia 2018 hoda. I ludziam davodzicca vypisvać haziety, bo «čynoŭniki majuć upłyŭ na ŭsie vidy biznesu».
«Naša Niva» patelefanavała ŭ adździeł ideałohii Biarozaŭskaha rajvykankama, kab zapytacca, jak u ich iduć spravy z padpiskaj.
«Hetyja listy — infarmacyjnyja. My pracujem razam z poštaj. Spravazdačy prosim dać, kab pošta viedała, jak joj pracavać na nastupny hod. Pošta ž nie maje prava sama pytacca ŭ arhanizacyj pra takoje, a nam cikava, jak i čamu štohod idzie źnižeńnie nakładaŭ na 2-3%. My pavinny viedać pryčyny, čamu heta adbyvajecca: praz ekanamičnuju situacyju ci hramadska-palityčnuju. Na kožnym pradpryjemstvie jość namieśnik pa ideałahičnaj pracy, i jamu treba vykarystoŭvać ŚMI ŭ tym liku dla svajoj pracy. My adsočvajem, jak pradpryjemstvy vykarystoŭvajuć lubuju presu dla infarmavańnia pracoŭnaha kalektyvu», — raspavioŭ načalnik adździeła ideałahičnaj raboty i pa spravach moładzi Alaksandr Krahiel.
«NN»: Ludzi pieražyvajuć, što kali jany «nie zrobiać» daviedzienyja tyražy, heta moža im niadobra adhuknucca.
Alaksandr Krahiel: Štości ja nie pamiataju, kab ludziej karali, kali jany niešta nie vypisvali. Luby moža admovicca ad padpiski — nam tolki treba patłumačyć pryčyny: ekanamičnaja situacyja, skaračeńnie kalektyvu, strukturnych padraździaleńniaŭ i hetak dalej. Nam treba viedać situacyju. Nijakich nastupstvaŭ nie budzie. Nidzie ž u listach nie napisana, što budzie pakarańnie. My razumiejem, što nasielnictva atrymlivaje infarmacyju i ź internetu, i ź inšych krynic. Nijakich pahroz niama, heta rabočaja situacyja.
«NN»: A sami vy što-niebudź vypisvajecie?
AK: Kaniečnie! «Majak» (rajonnaja hazieta — Red.) vypisvaju. «Sovietskuju Biełoruśsiju».
«NN»: I jak vam, padabajecca?
AK: Ja nie chaču kamientavać. Mnie, moža, padabajecca, a kamuści nie padabajecca. U vašaj ža haziety taksama byŭ padpisny indeks…
«NN»: «Naša Niva» nie davodziła arhanizacyjam nijakija płany pa padpiscy.
AK: Mahčyma, vy drenna pracavali z poštaj i nie byli zacikaŭlenyja ŭ tym, kab pašyrać vaš nakład. Niama ničoha kryminalnaha ŭ tym, što my razam z poštaj kantralujem situacyju ŭ miežach infarmacyjnaj palityki.
Kamientary