U Kobrynie na kanfierencyju pa hieorhijeŭskaj stužcy nie pryjšoŭ nichto z čynoŭnikaŭ. Arhanizatary z «Rusi» rasstrojenyja
U pačatku vieraśnia ŭ Kobrynie adbyłasia navukovaja kanfierencyja «Simvały pieramohi ŭ Vialikaj Ajčynnaj vajnie». Arhanizatary chacieli pravieści jaje z razmacham, ale amal usie zaprošanyja pradstaŭniki dziaržaŭnych instytucyj praihnaravali hety schod.
Sustreču arhanizoŭvała tavarystva «Ruś» (kiraŭnik — Ivan Korda). Jaho siabry paklikanyja prapahandavać ruskuju movu i rasijskuju kulturu.
Praŭda, vielmi časta «rusičy» stanoviacca aktyŭnymi ŭdzielnikami mierapryjemstvaŭ, jakija staviać metaj zmahańnie z kanśpirałahičnymi ordenami nakštałt masonaŭ.
Raniej «Naša Niva» pisała pra ich schod u Nacyjanalnaj biblijatecy, tady arhanizataram i kiraŭnikom byŭ aktyvist «Rusi» Uładzimir Sacevič.
Čytajcie: Desant rasijskich čarnasociencaŭ vysadziŭsia ŭ Akademii navuk Biełarusi i BDU
Ź ciaham času «Ruś» akazałasia pad pratektaratam «Rasijskich centraŭ navuki i kultury», jakija dziejničajuć u niekatorych haradach Biełarusi. Tady ŭ svaje pryjarytety arhanizacyja dadała i kłopat ab «histaryčnaj pamiaci».
Dapamahali ŭ arhanizacyi Kobrynski muziej imia Suvorava i «Mižnarodnaja słavianskaja akademija».
Vitalnaje słova pračytała kiraŭnik Rasijskaha centra navuki i kultury ŭ Breście Julija Siamienčanka.
«Jość ludzi, jakija padymajuć pytańnie, što hieorhijeŭskaja stužka — heta ruski simvał. Ułady jaho vyciskajuć! Pa inicyjatyvie BRSM pryniali jabłynievy ćviet. Ja zvaniŭ Varaniuku [kiraŭnik BRSM — Red.], a jon skazaŭ, što jany nie buduć ničoha mianiać. Tamu my praviali kanfierencyju z tym, kab dakazać, što koler pieramohi — heta hieorhijeŭskaja stužka. U nas byli navukoŭcy: Alaksandr Citaviec z BDU, Alaksandr Śviryd z Bresta. I my pastanavili, što simvał pieramohi — heta hieorhijeŭskaja stužka!» — tłumačyć «Našaj Nivie» arhanizatar kobrynskaha mierapryjemstva Uładzimir Sacevič.
Čamu ž jamu nie ŭdałosia sabrać na kanfierencyi ŭdzielnikaŭ ad dziaržaŭnych instytucyj?
«Nie było rasparadžeńnia z vykankama, ja sam taksama nie viedaŭ, chto heta ŭsio pravodzić», — pryznajecca kiraŭnik kobrynskaha adździaleńnia Sajuza aficeraŭ.
«Byli vučeńni ŭ vajenkamacie, tamu pradstaŭnik vykankama byŭ tam, a nie ŭ nas. Heta taki novy kłas čynoŭnikaŭ, jakija vykonvajuć tolki toje, što zahadajuć naviersie.
Miž tym, Hryškievič [staršynia Kobrynskaha rajvykankama — Red.] aficyjna dazvoliŭ hetuju kanfierencyju. Jany spačatku dali nam aktavuju zału vykankama pad praviadzieńnie, ale potym zajavili, maŭlaŭ, heta ž vychodnyja dni, režymny abjekt… Tamu dali pamiaškańnie ŭ škole mastactvaŭ.
I kadecki kłas nie pryjšoŭ, chacia ŭ nas była damoŭlenaść. Ale potym ja zvaniu piedahohu i jana kaža: «Nie». Čamu? «Bo ja tak vyrašyła». Ale ja pravioŭ rasśledavańnie i vyjaviŭ, što načalnica adździeła adukacyi skazała, što tut budzie šmat ruskich, tamu iści nie treba», — pryznaŭsia Sacevič.
Čamu «Ruś» nie pravodziła mierapryjemstvaŭ u padtrymku hieorhijeŭskaj stužki da 2013—2014 hoda, kali jana stała simvałam rasijskaj ahresii va Ukrainie?
«A tady nie było nieabchodnaści. Vy jašče skažycie, što svastyku nielha vykarystoŭvać, bo jaje Hitler vykarystoŭvaŭ. Jana isnuje i ŭ Indyi, i ŭ nas — u Rasijskaj impieryi. A pientahrama i zorka Sałamona… — heta formuła vady! Z rabotnikami ŚMI i adukacyi pracujuć peŭnyja słužby Harvardskaha ŭniviersiteta, idzie razmyvańnie i padmiena simvoliki. Idzie chałodnaja vajna. Na čyim baku «Naša Niva»?» — padsumavaŭ Sacevič.
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach19
Kamientary