Siońnia stała kryšačku zrazumieła, što za ludzi adpraŭlajuć za kraty apazycyjaneraŭ.
Na naradzie ŭ čaćvier Łukašenka daručyŭ staršyni Viarchoŭnaha sudu Valancinu Sukału vyzvalić ad pasad sudździaŭ Alenu Iljinu, Valerja Jeśmana i Tacianu Paŭlučuk. Usie jany akazalisia zamiešanymi ŭ karupcyjnym skandale razam z prakuroram Mienskaj vobłaści Michaiłam Śniehirom.
«Jakuju vy dumajecie pazycyju zaniali sudździa Iljina, Jeśman, Paŭlučuk? Sudździa Iljina ŭzhadniała pa telefonie (nia tolki apazycyju prasłuchoŭvajuć, jak bačym — Red.) sa Śniehirom paśladoŭnaść svaich dziejańniaŭ. A sudździ Jeśman i Paŭlučuk prymali rašeńnie nakłaści spahnańnie na źjomščyka kvatery Sidaroviča za nibyta samavolnuju pieraplaniroŭku kvatery», — emacyjna zaznačaŭ Łukašenka.
Varta zaznačyć, što ŭsie pieraličanyja sudździ ličacca najbolš adyjoznymi siarod apazycyi. Alena Iljina asudziła na dva hady kalonii Andreja Klimava, a Andreju Kimu dała paŭtara hodu turmy. Valery Jeśman u svoj čas pakaraŭ dvuma hadami «chimii» barysaŭskich «zubroŭ» Alaksandra Kazakova i Źmitra Zubra, jon dasudžvaŭ za Iljinoj fihurantaŭ «pracesu čatyrnaccaci». A litaralna praz paru tydniaŭ Jeśman musiŭ pačać razhlad kryminalnaj spravy Alaksandra Barazienki. Administracyjnyja sudy ŭ Taciany Paŭlučuk prachodziać jak pa kanvejeru. Tolki sioleta jana pakarała roznymi terminami źniavoleńnia niekalki dziesiatkaŭ (ci ŭsio ž bolš za sotniu?) moładzievych aktyvistaŭ. Trapicca na praces da Paŭlučuk ličycca najbolš nieprymalnym varyjantam.
A za što sudzili? Za vialikija parušeńni — za palityčnaje hrafici, za demanstracyju pratestu pradprymalnikaŭ, za artykuł u internecie, za niecenzurnuju łajanku i spraŭleńnie naturalnaj patreby ŭ hramadzkim miescy. Ci nia śmiešna?
Usie hetyja absurdnyja abvinavačvańni sudździami Iljinoj, Paŭlučuk i Jeśman prymalisia za čystuju manetu. Napeŭna, im u hałavu nie mahło pryjści vynieści apraŭdalnyja prysudy. I razam z tym, hetyja sudździ sami byli zamiašanyja ŭ daloka nia samych čystych spravach. Jak i prakurory Kupryjanaŭ, Śniehir, jakija taksama adznačylisia ŭ palityčnych spravach.
Siońnia stała kryšačku bolš zrazumieła, kaho staviać sudzić inšadumcaŭ.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie4949
Kamientary