«Jaho zadača — naroščvać prodažy zbroi». Što budzie čakać Łukašenka ad novaha kiraŭnika Dziaržvajenprama Ramana Hałoŭčanki
Žnivieński kadravy pieratrus va ŭradzie začapiŭ i kiraŭnika Dziaržvajenprama Aleha Dvihalova, jaki prabyŭ na svajoj pasadzie hod i adzin miesiac.
Zamiest jaho Łukašenka pryznačyŭ byłoha dypłamata Ramana Hałoŭčanku.
Hetaje pryznačeńnie vyhladaje admietnym, bo parušaje raniejšuju łohiku Łukašenki, jaki ličyŭ, što kiravać VPK mohuć tolki hienierały nakštałt Siarhieja Hurulova, jaki paśpieŭ pasłužyć kiraŭnikom Hienštaba, i Aleha Dvihalova — taksama hienierała z Hienštaba.
Hałoŭčanka fihura trochi inšaja — jon skončyŭ Maskoŭski dziaržaŭny instytut mižnarodnych adnosin MZS Rasii i biełaruskuju Akademiju kiravańnia pa ekanamičnaj śpiecyjalnaści.
Praŭda, jon usio ž byŭ ščylna źviazany ź siłavikami — pracavaŭ u Radzie biaśpieki i prakuratury, ale da štabnych vajskoŭcaŭ jaho adnieści nielha.
Hałoŭčanka maje dośvied pracy ŭ VPK — pry Hurulovie jon 2009 da 2014 adpracavaŭ pieršym namieśnikam.
Cikava, što Hałoŭčanka kuryravaŭ tam samy prablemny i stratehičny kirunak — adnosiny z Rasijaj.
Prablemny tamu, što Rasija nie choča dzialicca ź Biełaruśsiu svaimi technałohijami, pradavać sučasnuju zbroju i ŭvohule spryjać umacavańniu abaranazdolnaści.
Stratehičny — tamu što heta vialiki rynak zbytu.
Paśla Hałoŭčanka adpraviŭsia pracavać pasłom u Abjadnanyja Arabskija Emiraty, razam z hetym naładžvajučy suviazi z susiednimi krainami.
«Asabistyja suviazi na Uschodzie majuć vialikaje značeńnie dla paśpiachovaha supracoŭnictva. Na Uschodzie, kali vas zaprašajuć, to heta nie prosta prykmieta vietlivaść — heta znak taho, što vy ŭvachodzicie ŭ koła abranych ludziej, ź jakimi tut hatovyja havaryć i pracavać. Tak što etap «Formuły» ci luboje inšaje mierapryjemstva — heta nie bolš čym placoŭka sustrečy. Kali z taboj sustrakajucca na takim vysokim uzroŭni, to heta znak dla miascovaha bujnoha biznesu, što z taboj možna mieć spravu», — tłumačyŭ jon u intervju Tut.by asablivaści adnosin siamji Łukašenki i miascovaj arystakratyi.
Jakimi buduć zadačy Hałoŭčanki na pasadzie kiraŭnika VPK z ulikam jaho zdolnaściaŭ i asablivaściaŭ bijahrafii?
«Jon maje dośvied raboty va ŭmovach vializnaj kankurencyi na arabskim rynku ŭzbrajeńniaŭ. U vielmi płaciežazdolnych krain vialikija zapyty, jany kuplajuć tolki najlepšaje, — tłumačyć vajenny ekśpiert Alaksandr Alesin. — Tam ciažka kankuravać, ale niekalki razoŭ my vyjhravali tam tendary. Minski zavod kołavych ciahačoŭ, naprykład, radyjołakatary i inšaje. Hałoŭčanka viedaje, jak pracuje tamtejšaja sistema, jaje noravy. Heta dazvolić jamu bolš efiektyŭna prasoŭvać našyja prapanovy. Heta taki simvalizm i źmiena viektara raźvićcia — bolšaja aryjentacyja na prodaž, kab za košt vyručki madernizavać ułasnuju vytvorčaść. Jaho zadača — naroščvać ekspart zbroi».
«U adstaŭcy Dvihalova adyhrała rolu i toje, što zavod u Oršy pajšoŭ biez styrna i vietraziaŭ, i što ŭ Barani vytvorčaść abstalavańnia suviazi akazałasia ŭ zatuchłym stanie. My siońnia nie možam hublać patencyjał nivodnaha kalektyvu, jaki maje technałohii i ludziej z dośviedam. Ja tut baču taksama praciah kursu na vypusk ułasnaha ŭzbrajeńnia, kankuretnaj pradukcyi, jakuju my zmožam i vykarystoŭvać, i pradavać taksama. Va ŭmovach poŭnaj adsutnaści intaresu Rasii ŭ palapšeńni stanu našaha vojska», — padsumavaŭ Alesin.
Padobnaj dumki trymajecca i ekśpiert Andrej Parotnikaŭ.
«Ja nie dumaju, što Dvihaloŭ asabliva ŭ niečym pravaliŭsia. Heta emacyjnaje rašeńnie Łukašenki. Dvihalova najpierš pryznačali, kab naładzić ułasnuju vytvorčaść zienitna-rakietnaha kompleksu, bo jon, jak avijatar, u hetym raźbiraŭsia. Treba skazać, što ŭ płanie madernizacyi my majem siarod pośpiechaŭ tolki «Pałanez», usio astatniaje kulhaje i adstaje ad suśvietnych anałahaŭ. Hałoŭčanku treba budzie zaniacca hetym, a taksama naraścić ekspart vajskovaj pradukcyi — u jaho vialiki dośvied raboty ŭ płaciežazdolnym rehijonie, važnym dla režymu Łukašenki», — miarkuje kiraŭnik prajektu Belarus security blog Andrej Parotnikaŭ.
* * *
Raman Hałoŭčanka
Naradziŭsia 10 žniŭnia 1973 hoda ŭ Žodzinie.
Skončyŭ Maskoŭski dziaržaŭny instytut mižnarodnych adnosin MZS Rasii (1996), Akademiju kiravańnia ŭ Biełarusi (2003).
U 1997—2002 — hałoŭny śpiecyjalist sakrataryjata Rady biaśpieki.
U 2002—2005 — namieśnik načalnika adździeła Hienieralnaj prakuratury.
U 2005—2006 — hałoŭny daradca ŭpraŭleńnia źniešniaj palityki Administracyi prezidenta.
U 2006—2009 hadach — hałoŭny daradca adździeła supracoŭnictva ŭ śfiery mižnarodnaj biaśpieki, hałoŭny daradca ŭpraŭleńnia mižnarodnaj biaśpieki sakrataryjata Rady biaśpieki.
Ź lipienia 2009 pa śniežań 2009 hoda — daradca-pasłańnik pasolstva Biełarusi ŭ Polščy.
Sa śniežnia 2009 pa krasavik 2013 — pieršy namieśnik staršyni Dziaržaŭnaha vajenna-pramysłovaha kamiteta.
Z krasavika 2013 pa žnivień 2018 — pasoł u AAE.
Vałodaje anhlijskaj, arabskaj, niamieckaj i polskaj movami.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary