U mahiloŭskim tatu-sałonie admovilisia nabivać klijentu Pahoniu
38-hadovy mahiloviec Hleb Śvietły raspavioŭ «NN», što zachacieŭ nabić na plačy «Pahoniu». Pryjšoŭ u mahiloŭski tatu-sałon «INK-ART» na Pijanierskaj, 50, ale tamtejšy majstar niečakana admoviŭsia vykonvać pracu.
«Ja daŭno chacieŭ źniešnie adznačyć svaje ŭnutranyja pohlady. Ja nie niejki tam luty nacyjanalist, pracuju łahistam, ale lublu historyju svajoj Radzimy ŭ lubyja jaje časy.
Dyk voś zapłanavaŭ nabić na plačo Pahoniu. Pryjšoŭ u tatu-sałon na Pijanierskaj. Administratar sustreŭ vietliva, udakładniŭ, što ja chaču. Ja rastłumačyŭ, što Pahoniu. Jon nie viedaŭ, što heta (što mianie ździviła), tamu my razam pašukali karcinki ŭ internecie. Paśla administratar nakiravaŭsia da majstra, kab udakładnić košt i inšyja pytańni. Ale ŭ vyniku mnie pieradali, što jon admoviŭsia rabić pracu. Ja sprabavaŭ raspytać, čamu, ale ŭ adkaz nie atrymaŭ ničoha vyraznaha. Nie razumieju, čamu nielha padzialać pracu i asabistyja pohlady. Dy i što takoha strašnaha ja paprasiŭ? Ja ŭvohule dumaŭ, što ŭsie tatu-majstry — brutalnyja, biez anijakich strachaŭ», — zadajecca pytańniem Hleb.
Administratar tatu-sałona ŭ kamientary «NN» raspavioŭ, što ich supracoŭniku prosta «niecikava pracavać u hetym kirunku»: «Niechta moža paprasić partaki nabić ci toje, što modna było 20 hod tamu — heta niecikava». Adnak dać numar samoha majstra admoviŭsia.
Što tyčycca Hleba, to paśla hetaj situacyi mužčyna jašče bolš umacavaŭsia ŭ žadańni zrabić tatu z Pahoniaj.
Na nastupny dzień paśla publikacyi z nami źviazałasia kiraŭnictva sałona i paprasiła dadać, što palityčnych matyvaŭ u dziejańniach ich majstra nie było. «My lubim Biełaruś, prosta taki siužet našamu majstru niecikavy».
Kamientary