Adździeł adukacyi Kapylskaha rajvykankama nazvaŭ šmatdzietnyja i siemji viernikaŭ «niebiaśpiečnymi». Heta jany surjozna?
Naviedvalniki sajta adździeła adukacyi Kapylskaha rajvykankama vielmi ździvilisia, kali ŭbačyli mietadyčny dapamožnik «Praca ź dziećmi, jakija majuć patrebu ŭ sacyjalna-psichałahičnaj padtrymcy». U im znajšlisia niehatyŭnyja kamientary ŭ bok šmatdzietnych siemjaŭ, a taksama tych, dzie jość baćki-vierniki ci ź invalidnaściu.
Da niebiaśpiečnych siemjaŭ stvaralniki mietadyčki taksama adnieśli niapoŭnyja, małazabiaśpiečanyja, pryjomnyja, a taksama siemji pierasialencaŭ, biežancaŭ i emihrantaŭ.
Voś tolki niekalki cytat: «Šmatdzietnyja siemji i siemji viernikaŭ «charaktaryzujucca najaŭnaściu niekatoraha adchileńnia ad normaŭ, jakoje nie dazvalaje vyznačyć ich jak biaśpiečnyja», «Najaŭnaść nazvanych faktaraŭ abumoŭlivaje nieabchodnaść pastanoŭki siamji na ŭlik, ale, kali sprava supravadžajecca kanfliktami i napruhaj unutrysiamiejnych adnosin, to takaja siamja pieramiaščajecca ŭ katehoryju prablemnych siemjaŭ, a pry najaŭnaści peŭnych pryčyn pierachodzić u katehoryju siemjaŭ, jakija znachodziacca ŭ sacyjalna niebiaśpiečnym stanoviščy».
My patelefanavali ŭ miascovy adździeł adukacyi, kab vyśvietlić, chto staŭ aŭtaram takoha dziŭnaha dapamožnika i ci sapraŭdy čynoŭniki bačać niebiaśpieku ŭ padobnych siemjach.
Jak patłumačyŭ «NN» namieśnik načalnika adździeła adukacyi, sportu i turyzmu Alaksandr Dubina, dadzienaja infarmacyja zachavałasia na sajcie vypadkova. U hetym vinavatyja tyja, chto pracavaŭ u adździele raniej:
«Rekamiendacyi, pra jakija idzie havorka, byli raspracavanyja jašče dla 2012/2013 navučalnaha hoda ludźmi, jakija siońnia ŭ nas nie pracujuć. Čamu ich zvolnili? Vidać, byli niekampietentnymi śpiecyjalistami. A novy supracoŭnik nie paśpieła paznajomicca z tym, što apublikavali na sajcie da jaje. Zapeŭnivajem vas: my nie ličym, što siemji z baćkami-viernikami ci ź invalidnaściu źjaŭlajucca niebiaśpiečnymi, heta infarmacyja nie adpaviadaje realnaści, tamu my apieratyŭna vydalili hetuju mietadyčku».
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie36
Kamientary