Chakiery z hrupoŭki Cobalt, jakija letam 2016 hoda prymusili bankamaty na Tajvani i ŭ Tajłandzie vydavać hrošy, u pieršaj pałovie 2017 hoda atakavali bolš za 250 arhanizacyj pa ŭsim śviecie, rassyłajučy listy ad imia Visa i MasterCard, piša rbc.ru.
Chakierskaja hrupoŭka Cobalt, viadomaja maštabnymi napadami na finansavyja ŭstanovy, i jakaja, jak miarkujecca, maje rasiejskija karani, u 2017 hodzie značna pašyryła śfieru dziejnaści. Pavodle spravazdačy kampanii Positive Technologies, jakaja śpiecyjalizujecca ŭ halinie infarmacyjnaj biaśpieki, u pieršaj pałovie 2017 hoda Cobalt razasłała fišynhavyja listy, jakija źmiaščajuć u sabie zaražanyja fajły, bolš čym 3 tys. atrymalnikaŭ z 250 kampanij u 12 krainach śvietu.
Da śpisu tradycyjnych dla Cobalt celaŭ, jakija znachodziacca ŭ SND, krainach Uschodniaj Jeŭropy i Paŭdniova-Uschodniaj Azii, dadalisia kampanii, raźmieščanyja ŭ Paŭnočnaj Amierycy, Zachodniaj Jeŭropie i Paŭdniovaj Amierycy, u pryvatnaści ŭ Arhientynie. U śfiery intaresaŭ hrupoŭki ciapier nie tolki banki, ale i biržy, strachavyja kampanii, inviestfondy i inšyja arhanizacyi.
Mietady chakieraŭ evalucyjanujuć. Pierš, čym atakavać banki, Cobalt uzłomvaje infrastrukturu ich partnioraŭ - čverć usich napadaŭ prychodzicca na dziaržarhanizacyi, pramysłovyja kampanii, telekamunikacyjnyja apieratary i pradpryjemstvy ź śfiery miedycyny.
Hrupoŭka masava adpraŭlaje fišynhavyja listy z padrobnych damienaŭ, jakija imitujuć paviedamleńni ad Visa, MasterCard, centra reahavańnia na kibierataki ŭ finansavaj śfiery Centralnaha banka Rasii (FinCERT) i Nacyjanalnaha banka Respubliki Kazachstan, raspaviali ŭ Positive Technologies. Dla hetych metaŭ Cobalt vykarystała jak minimum 22 padrobnyja damieny, što imitujuć sajty bujnych finansavych arhanizacyj i ich kontrahientaŭ.
Fišynhavaja rassyłka źmiaščaje škodnasny fajł, zvyčajna dakumient Microsoft Word. Paśla jaho adkryćcia karystalnikam zapuskajecca prahrama, jakaja nie daje sistemie antyvirusnaj abarony zreahavać na virus. Paśla čaho zahružajecca trajan, jaki dazvalaje arhanizavać vydaleny dostup da pracoŭnaha kamputara supracoŭnika kampanii-achviary. Dalej złamyśniki mohuć albo raźvivać ataku ŭnutry arhanizacyi, albo adpravić sa ŭzłamanaha pracoŭnaha stała list z anałahičnym škodnasnym softam u inšuju arhanizacyju.
Škoda rasijskich bankaŭ ad dziejańniaŭ chakieraŭ za 2016 hod skłaŭ krychu bolš za 2 młrd rubloŭ (kala $30 młn). Siaredniaja škoda ad kibierataki ŭ hety pieryjad u śviecie ŭ siarednim składała $926 tys.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam6
Kamientary