Šejman, Labiedźka, Horvat: šukajem redkija proźviščy ŭ bazie «Dapamožnik»
Na minułym tydni ŭ internecie źjaviłasia baza dla pošuku prodkaŭ, jakaja naličvaje bolš za 47 tysiač nasielenych punktaŭ i bolš za 300 tysiač proźviščaŭ. Jaje ŭ adkryty dostup vykłaŭ Biełaruski navukova-daśledčy centr elektronnaj dakumientacyi (BiełNDCED).
«Naša Niva» vyrašyła krychu pahulacca ź viadomymi ŭ krainie proźviščami. Pahladzieć, adkul patencyjna mohuć pachodzić tyja ci inšyja rody.
Proźvišča «Šejman», jakoje nosić były dziaržsakratar Rady biaśpieki i ciapierašni kiraŭnik spraŭ prezidenta, sustrakajecca ŭ pošukaviku ŭsiaho trojčy. Dźvie zhadki z troch viaduć u Karelicki rajon.
I choć sam Šejman naradziŭsia ŭ Voranaŭskim rajonie, ale jaho baćki byli nie miascovymi, jany pryjechali na samy zachad Biełarusi akurat z Karelickaha rajona.
Proźvišča byłoha premjer-ministra Michaiła Miaśnikoviča možna znajści čatyry razy. Dvojčy ŭ Žytkavickim rajonie, a jašče dvojčy — u Niaśvižskim. Miaśnikovič pachodzić sa Snova Niaśvižskaha rajona.
Ciapierašni premjer-ministr Andrej Kabiakoŭ naradziŭsia ŭ Rasii. Cikava, što ŭ Biełarusi proźvišča Kabiakoŭ isnuje ŭ dvuch hieahrafična addalenych adna ad adnoj kropkach — na Viciebščynie (Haradocki i Połacki rajony) i na Homielščynie (Homielski, Chojnicki i Dobrušski rajony).
Davydźki (takoje proźvišča ŭ staršyni Biełteleradyjokampanii) sustrakajucca ŭ Sieńnienskim rajonie Viciebskaj vobłaści. Adrazu try takija vioski. Hienadź Branisłavavič rodam z Papoŭki.
Vakulčykaŭ, jak akazałasia, vielmi bahata. Ciozki pa proźviščy i svajaki staršyni KDB kampaktna pražyvajuć na Bieraściejšynie, a mienavita ŭ Drahičynskim rajonie. «Naša Niva» daŭno pisała, što Vakulčyk pachodzić mienavita z tych miaścin, chacia aficyjnyja bijahrafii pra heta maŭčać.
A voś proźvišča byłoha kiraŭnika Administracyi prezidenta Alaksandra Kosinca sustrakajecca vyklučna ŭ Tałačynskim rajonie. Sam Kosiniec z Aršanskaha. Heta blizka, ale ŭ daviedniku nie zafiksavana zusim.
Piarojdziem da apazicyjnych palitykaŭ. Proźvišča Sieviaryniec sustrakajecca na mapie tolki ŭ Rečyckim rajonie. Sam Pavieł naradziŭsia ŭ Aršanskim, a hadavaŭsia ŭ Viciebsku. Rečycki ž rajon zusim nie vypadkovy, adtul pachodzić baćka palityka i piśmieńnika.
Proźvišča Labiedźka sustrakajecca ŭ dapamožniku trojčy: u Čačerskim, Žłobinskim i Staŭbcoŭskim rajonach. Mienavita z apošniaha rodam staršynia AHP.
Staršynia BNF Alaksiej Janukievič naradziŭsia ŭ Minsku, ale rod jahony pachodzić z Baranavickaha rajona. Na karcie lohka znajści hetamu paćvierdžańnie. Proźvišča Janukievič taksama maje redaktar niedziaržaŭnaj baranavickaj haziety Intex-press.
Z kolišnim kandydatam u prezidenty Alaksandram Milinkievičam taksama ŭsio zrazumieła. U asnoŭnym takoje proźvišča sustrakajecca ŭ Ščučynskim rajonie, jość navat rodnyja dla palityka Bieršty.
Dakładna pakazvaje adkul rod miljaniera Šakucina — Aršanski rajon. A voś proźvišča inšaha «aliharcha» — Mašenski — nie sustrakajecca zusim.
Hetak sama niemahčyma znajści nivodnaha Michałka. A voś proźvišča Varaškievič (jak u lidara hurta «Krama») najčaściej sustrakajecca ŭ Salihorskim rajonie. Sam Varaškievič rodam z Baranavič.
Nie znachodzić razumnaja mašyna nivodnaha «Horvata». Zatoje daje mnostva spasyłak na Chadanovičaŭ z Karmianskaha rajona Homielščyny.
Proźvišča Hleb, jak u samaha słavutaha biełaruskaha futbalista, sustrakajecca čatyry razy, ale tolki ŭ dvuch rajonach — Hancavickim i Minskim.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary