Astapovič: Budoŭla ŭ Kurapatach — nie pahonia za hrašyma, a vynik pamyłki ŭ sistemie
Anton Astapovič, staršynia hramadskaha abjadnańnia «Biełaruskaje dobraachvotnaje tavarystva achovy pomnikaŭ historyi i kultury», atrymaŭ adkaz ad minskaj prakuratury.
List pryśviečany vynikam pravierki praviadzieńnia aŭkcyjona pa ziamielnym učastku la Kurapataŭ, vydzielenym pad budaŭnictva ofisnaha centra. Hety ŭčastak na momant praviadzieńnia aŭkcyjona ŭvachodziŭ u miežy achoŭnaj zony Kurapat, jakija byli zaćvierdžany ŭ 2004-m hodzie.
«Nie budu šmat kamientavać. Chaču ahučyć asnoŭnaje, što ź lista vynikaje, i pra što nieadnarazova havaryłasia i pisałasia. Čarhovy raz ja ŭpeŭniŭsia, što ŭ Biełarusi niama narmalnaj, celnaj dziaržaŭnaj sistemy. Niahledziačy na vieličeznuju centralizacyju, sistema funkcyjanuje ŭ roznych płaskaściach, jakija nikoli nie pierasiakajucca adna z druhoj, — aburajecca Astapovič. — Jaskravy fakt, jaki adlustravany ŭ liście — «Biełdzipraziem», instytut, jaki zajmajecca ziemleŭładkavańniem u Biełarusi, nie mieŭ infarmacyi pra miežy achoŭnych zon, jak vynik, zhodna ź jaho raspracoŭkami, ziamielny ŭčastak i byŭ uklučany ŭ pieralik tych učastkaŭ, jakija, zhodna z płanam, pavinny byli vystaŭlacca na aŭkcyjon dla realizacyi inviestprajektaŭ.
Hety vypadak nu nijak nie źjaŭlajecca śviadomym nastupam na miežy historyka-kulturnaj kaštoŭnaści ŭ Kurapatach. Heta admoŭnaja praktyka ŭ dačynieńni praktyčna dla ŭsich pomnikaŭ i ich achoŭnych zonaŭ.
Praktyčna nivodzin abjekt, jaki maje status pomnika i maje zaćvierdžanyja achoŭnyja zony, nie naniesieny na ziemleŭładkavalnyja karty, vielmi časta prajektnyja arhanizacyi, navat bujnyja dziaržaŭnyja, taksama nie majuć u svajoj dakumientacyi vyznačanych miežaŭ historyka-kulturnych kaštoŭnaściaŭ i ich achoŭnych zonaŭ».
Na dumku Antona Astapoviča, prablema nie stolki ŭ Kurapatach, kolki ŭ samoj sistemie.
«Prablema nie ŭ tym, što drennaja ŭłada choča źniščyć pamiać pra trahičnyja padziei savieckaj epochi. Prablema ŭ tym, što nie pracujuć u poŭnym abjomie miechanizmy pa vykanańni pravavych normaŭ, prablema va niaŭzhodnienaści dziejańniaŭ šmatlikich dziaržaŭnych strukturaŭ. I, adpaviedna, prablemu treba vyrašać kompleksna, bo zasiarodžvajučysia tolki na Kurapatach, na tych ža Kurapatach i dziaržava, i hramadstva buduć nastupać na adnyja i tyja ž hrabli», - padkreśliŭ Astapovič.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie4949
Kamientary