Vaśmihadovy chłopčyk uziaŭ furhon baćkoŭ, kab advieźci małodšuju siastru ŭ «Makdonalds»
Vaśmihadovy chłopčyk u Ahajo ŭziaŭ siamiejny furhon i advioz čatyrochhadovuju siastru ŭ bližejšy «Makdonalds». Dzieci vielmi mocna chacieli źjeści čyzburhier. Darečy, chłopčyk, čyjo imia nie nazyvajecca, zdoleŭ prajechać na aŭtamabili tak, što ŭ palicejskich nie zastałosia da jaho nijakich pretenzij.
Jak paviedamlaje vydańnie Inside Edition, chłopčyk zasvoiŭ uroki kiravańnia z dapamohaj navučalnych videa na jutubie. Viečaram u niadzielu, kali mama dziaciej zasnuła, jany ŭziali ŭ jaje klučy ad aŭtamabila i adpravilisia ŭ restaran chutkaha charčavańnia. Kab kupić čyzburhiery, chłopčyk vyrašyŭ achviaravać svajoj śvińnioj-skarbonkaj.
U palicyju horada Ist Palestyn, dzie žyvuć brat i siastra, pastupiła niekalki zvankoŭ ad minakoŭ, jakija byli źbiantežanyja vidam dziciaci za rulom furhona. Kali palicejskija prybyli da «Makdonaldsa», dzieci jakraz tarmazili la akna absłuhoŭvańnia kiroŭcaŭ.
«Heta dziŭna, — skazaŭ pradstaŭnik palicyi Ist Palestyn Džiejkab Koler. — Jany ź siastroj dajechali da «Makdonaldsa», vykonvajučy ŭsie praviły ruchu».
Dzieci prajechali pryblizna milu da bližejšaha «Maka», pry hetym 4 razy spynilisia na śviatłaforach i nie źnieśli pa šlachu nivodnaj śmietnicy abo paštovaj skryni, čaho možna było b čakać ad vaśmihadovaha dziciaci. Praŭda, kab daciahnucca da piedalaŭ, chłopčyku daviałosia jechać stojačy.
Nieŭzabavie paśla prybyćcia palicyi da «Makdonaldsa» pryjechali i baćki uciekačoŭ. Jany adreahavali nie vielmi strymana na ŭčynak dziaciej, tamu Inside Edition ich kamientaroŭ nie pryvodzić. Niahledziačy na incydent, u palicyi niama pretenzij da dziciaci abo jaho baćkoŭ, bo chłopčyk nie parušaŭ praviły padčas pajezdki.
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary