Biełaruski padručnik historyi dahetul admaŭlaje rasstreły ŭ Katyni
Padručnik ad 2012 hoda nie abviazkovy, ale dapuščany Ministerstvam adukacyi.
Školnikam iłhuć pra adnu z samych haniebnych staronak historyi XX st.
Rasstreł vajennapałonnych — heta vajennaje złačynstva. Zabojstva 22 tysiač polskich aficeraŭ u 1940 hodzie było sapraŭdnaj katastrofaj dla Polščy. Zahinuła nacyjanalnaja elita. Hetaja trahiedyja kranaje i biełarusaŭ: siarod achviaraŭ byli sotni vychadcaŭ z Zachodniaj Biełarusi, roznych nacyjanalnaściej.
Jak śviedčać dakumienty, zahad na źniščeńnie sychodziŭ ad Stalina i jahonaha najbližejšaha atačeńnia. Heta była častka palityki pa fizičnym vyniščeńni nacyjanalnych elit zachoplenych krain.
Rasija pieradała Polščy siem dziasiatkaŭ tamoŭ kryminalnych spraŭ, kala miljona staronak dakumientaŭ. Za savieckaje złačynstva prabačeńnia prasiŭ prezident Rasii Uładzimir Pucin, a Duma ŭ 2010 hodzie pryniała śpiecyjalnuju zajavu, u jakoj uskłała vinu za złačynstva na Stalina.
Ale aŭtar biełaruskaha padručnika pa historyi dla 11 kłasa, prafiesar Jaŭhien Novik, praciahvaje złačynstva admaŭlać.
«Pravodzilisia šmatlikija rasśledavańni, ale i ciapier praz adsutnaść nieabchodnych dakumientalnych materyjałaŭ i žyvych śviedkaŭ hetaj trahiedyi dakładna nie vyznačana, jakaja kraina vinavataja ŭ rasstrele polskich aficeraŭ», — havorycca ŭ padručniku, vydadzienym u 2009 hodzie.
Ad 2012 hoda padručnik Novika nie abaviazkovy, ale dapuščany Ministerstvam adukacyi i moža vykarystoŭvacca pa žadańni nastaŭnikaŭ.
Archivist Źmicier Drozd u siabie ŭ fejsbuku nazvaŭ takuju traktoŭku historyju bluźnierstvam. «Heta niejki zmrok!» — piša Drozd.
U cełym padručnik apisvaje historyju ź impierska-rasijskich, a nie biełaruskich pazicyj. Što da falsifikacyi histaryčnaj praŭdy pra Katyń, to jana zdolnaja azmročyć biełaruska-polskija adnosiny.
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje23
Kamientary