Žonka treciaha prezidenta Hruzii Michaiła Saakašvili Sandra Rułaŭs paviedamiła ŭ CVK, što admaŭlajecca ad svajho deputackaha mandatu. Pra heta paviedamlaje pres-słužba Centralnaj vybarčaj kamisii Hruzii.
Sandra Rułaŭs była druhim numaram u śpisie byłoj kirujučaj partyi «Adziny nacyjanalny ruch» (ANR), zasnavalnikam jakoj źjaŭlajecca jaje muž.
Deputatam parłamienta jana stała paśla taho, jak ANR atrymaŭ 27 miescaŭ u parłamiencie Hruzii pa vynikach vybaraŭ, jakija prajšli ŭ dva tury — 8 i 30 kastryčnika.
«Rułaŭs paviedamiła nam pra svoj namier. CVK Hruzii nie ŭpaŭnavažanaja zdymać deputataŭ z pasady, heta pavinien budzie zrabić parłamient paśla taho, jak źbiarecca. Centralnaja vybarčaja kamisija nazavie parłamientu tolki proźvišča jaje pravapierajemnika», — rastłumačyli ŭ CVK Hruzii.
Sandra Rułaŭs taksama była kandydatam u mažarytarnyja deputaty ad Zuhdzidskaj vybarčaj akruhi, ale, prajšoŭšy ŭ druhi tur, admoviłasia ad udziełu ŭ vybarach, zajaviŭšy, što ŭłada stvaryła ŭ rehijonie Samehreła ciažkuju abstanoŭku i jaje prychilniki padviarhajucca cisku.
Sam Michaił Saakašvili paśla abviaščeńnia vynikaŭ vybaraŭ 8 kastryčnika zaklikaŭ členaŭ AND admovicca ad udziełu ŭ druhim tury hałasavańnia i bajkatavać pracu parłamienta dziaviataha sklikańnia, pastaviŭšy pad sumnieŭ lehitymnaść vybaraŭ.
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary