Siabar nacyjanał‑balšavickaj partyi Alaksiej Mitrafanaŭ, jaki špurnuŭ u palityka dva jajki na Smalenskim kirmašy ŭ Viciebsku, aštrafavany na 70 tysiač. Dla paraŭnańnia: u Słonimie za arhanizacyju sustrečy z palitykam asudzili na 700 tys.
Zajavu ŭ milicyju pra incydent, jaki adbyŭsia 23 traŭnia na Smalenskim kirmašy, napisaŭ kaardynatar viciebskaha abłasnoha kamitetu pa stvareńni Ruchu «Za Svabodu» Chrystafor Žalapaŭ. Raźbitymi jajkami akazałasia vypeckanym mienavita jahonaje adzieńnie, chacia student 4‑ha kursu histaryčnaha fakultetu VDU Alaksiej Mitrafanaŭ adrazu zajaviŭ, što celiŭ u Milinkieviča. Toj sustrakaŭsia ŭ toj dzień na kirmašy z žycharami horada i pradprymalnikami — kalehami palitviaźnia Siarhieja Parsiukieviča.
Adnak na sud nad chulihanam, jaki pradstaviŭsia prychilnikam NBP, Chrystafora Žalapava nie zaprasili. Pra toje, što Alaksiej Mitrafanaŭ pakarany, Chrystafor Žalapaŭ daviedaŭsia z SMS‑paviedamleńnia, dasłanaha samim aštrafavanym. U im havaryłasia:
«Mnie dali dźvie bazavyja vieličyni štrafa, ich ja zapłaču. Ale ci nia soramna vam za vaš paklop? Vy ž viedajecie, što ŭ vas ja jajkami nie kidaŭ».
Chrystafor Žalapaŭ nia ličyć, što Alaksieja Mitrafanava možna nazvać achviaraj paklopu, bo hety čałaviek śviadoma ździejśniŭ chulihanski ŭčynak. Pavodle viciebskaha aktyvista, sud musiŭ pastavicca ła hetaha zdareńnia bolš surjozna, bo incydent maje pad saboj palityčnuju hlebu.
Taksama spadar Žalapaŭ ličyć parušeńniem toje, što jamu nie paviedamili pra sudovaje rašeńnie, i što pra vynik raźbiralnictva jon daviedaŭsia z telefonnaha paviedamleńnia, jakoje da taho ž prynižaje jahonuju čałaviečuju hodnaść.
Kamientary