Šnobieleŭskuju premiju atrymali čałaviek-kazioł i kampanija Volkswagen
Brytaniec, jaki try hady pražyŭ u Alpach u roli kazła, atrymaŭ Šnobieleŭskuju premiju 2016 hoda ŭ halinie bijałohii. Tom Tuejts prydumaŭ śpiecyjalnyja pratezy, kab pierasoŭvacca ŭ harach na manier parnakapytnych.
Tuejts paśviŭ koz, chadziŭ pa-kaźlinamu i jeŭ travu. Jon navat naładziŭ siabroŭskija adnosiny z adnym ź miascovych kazłoŭ, a adnojčy cudam uniknuŭ sutyčki ź inšymi samcami.
Svaju premiju brytaniec padzialiŭ z suajčyńnikam, Čarlzam Fosteram, jaki ŭvasablaŭsia ŭ rolu barsuka, lisy i alenia.
Kampanija Volkswagen atrymała Šnobiela za vynachodstva sposabu padmanvać testy na ŭtrymańnie ŭ vychłapnych hazach vokisu azotu.
Premiju ŭ halinie repradukcyi dali jehipieckamu ŭrołahu Achmiedu Šafiku, jaki nadziavaŭ na samcoŭ pacukoŭ štoniki, zroblenyja całkam z paliesteru, paliesteru z bavoŭnaj, z bavoŭny i čystaj voŭny. Takim čynam doktar vyvučaŭ upłyŭ roznych materyjałaŭ na seksualnaje žyćcio hryzunoŭ. Paliester, jak pakazała daśledavańnie, źnižaje pałavuju aktyŭnaść.
Premiju ŭ halinie ekanomiki dali Marku Avisu, prafiesaru z Novaj Ziełandyi. Jon vyvučaŭ razam z kalehami, jakimi čałaviečymi jakaściami ludzi nadzialajuć roznyja minierały i hornyja parody. U raździeł ekanomiki hetaja praca trapiła za toje, što daśledavańnie «charaktaru kamianioŭ» kidaje vyklik navukovaj teoryi pra nadzialeńnie niejkimi čałaviečymi jakaściami viadomych rynkavych brendaŭ.
Inšyja Šnobieleŭskija premii byli ŭručanyja za daśledavańni pra luboŭ strakozaŭ da čornych nadmahilnych plitaŭ, za litaraturny tvor pra kalekcyjanavańnie miortvych i žyvych much i inšyja zajmalnyja daśledavańni.
Šnobieleŭskaja premija ŭručajecca ŭ Harvardskim univiersitecie ŭžo 26 hadoŭ. Jaje dajuć za kurjoznyja daśledavańni i adkryćci, jakija «spačatku vyklikajuć uśmiešku, ale potym prymušajuć zadumacca».
Ź biełarusaŭ premiju atrymlivaŭ Alaksandr Łukašenka — za zabaronu apładziravać na vulicach.
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach19
Kamientary