Apazycyja ŭ Centarvybarkamie ŭžo prysutničała, i davoli masava. Ale puhaj abucha nie pierabješ. Piša ŭ svaim błohu Alaksandar Kłaskoŭski
Presa, asabliva zamiežnaja, praciahvaje znachodzić siakieru pad łavaj. Namier biełaruskich uładaŭ ułučyć ŭ Centarvybarkam kolki tam apazycyjaneraŭ z daradčym hołasam nazyvajuć ni mnoha ni mała sensacyjaj.
Emocyi ahladalnikaŭ-neafitaŭ śviedčać jak minimum pra dźvie rečy.
Pa-pieršaje, Miensku ŭdałosia-taki hetaj deklaracyjaj puścić pył u vočy.
Pa-druhoje, udzieł pradstaŭnikoŭ apazycyi ŭ dziejnaści CVK padčas parlamenckaj kampanii 2004 hodu akazaŭsia takim małavynikovym i nierezanansavym, što pra hety precedent, ličy, usie zabylisia. Nia tolki šarahovaja publika, ale i balšynia naziralnikaŭ :)
Miž tym tady, u 2004-m, u skład CVK z pravam daradčaha hołasu byli ŭłučanyja pradstaŭniki šerahu partyjaŭ, u tym liku BNF, AHP, BSDH (Narodnaja Hramada)... U pasiedžańniach pad kiraŭnictvam spn. Jarmošynaj brali ŭdzieł takija davoli viadomyja fihury z alternatyŭnaha lahieru, jak Pliska, Niściuk, Bialacki. Adnak ichnija filipiki, jak niaciažka było pradbačyć, akazalisia harocham ab ścienku.
"Amal što harocham ab ścienku, — udakładniŭ u razmovie sa mnoj Aleś Bialacki. — Niejki minimalny efekt byŭ. Z nami musili pahadžacca, kali my pakazvali na vidavočnyja parušeńni zakanadaŭstva. Usio ž tam jurysty… Udałosia, naprykład, adstajać niekatorych niespraviadliva "zrezanych" kandydataŭ".
Karaciej, reziumuje surazmoŭca, sens udzielničać byŭ: heta ŭsio ž niejak napružvała, dyscyplinavała tych, chto prymaŭ rašeńni. Chacia — vy ž sami razumiejecie: CVK fizična nia ličyć biuleteni, a maje spravu ŭžo z toj arytmetykaj "elehantnych pieramohaŭ", što ściakajecca z akruhaŭ.
Ciažka spadziavacca, što "dubal dva" akažacca bolej plonnym u sensie ŭździejańnia na vyniki kampanii. I ŭsio ž apazycyi varta ŭklinoŭvacca ŭ lubuju ščylinu ŭładnaje piramidy. Čakać, pakul dazvolać zmahacca za ŭładu pa džentlmenskich praviłach, možna da skonu vieku.
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii11
Kamientary