Mery troch francuzskich haradoŭ zajavili, što ŭviaduć zabaronu na burkini (musulmanski kupalny kaścium dla žančyn) pa prykładzie Kan.
Mer horada Lokat Mišel Pi skazaŭ, što płanuje zabaranić naviedvańnie plažaŭ tym, chto apranuty «nieadpaviedna maralnym pavodzinam i pryncypam siekularyzmu».
Kiraŭnik horada Ua-Płaž Aliŭje Maževič zajaviŭ, što ŭviadzie zabaronu na burkini paśla taho, jak ubačyŭ žančynu z zakrytym ciełam (u tym liku i vačami), jakaja išła na plaž.
Pa słovach mera horada Le-Tukie Daniela Faskiela, jon zabaronić burkini «dziela baraćby z nasadžeńniem relihii». «Pakul u Le-Tukie niama burkini, ale ja nie chaču, kab meryja była zaśpietaja źnianacku», — skazaŭ kiraŭnik horada.
Premjer-ministr Francyi Manuel Vals padtrymaŭ zabaronu na burkini. «Plažy, jak i lubyja inšyja hramadskija miescy, pavinny być svabodnyja ad relihii», — skazaŭ Vals. Pavodle jaho słoŭ, na ŭzroŭni krainy ŭvodzić padobnuju zabaronu nie płanujecca.
Pieršym zabaronu na burkini ŭvioŭ mer Kan ŭ kancy lipienia, nieŭzabavie paśla teraktu ŭ susiedniaj Nicy. Prykład uziali jašče dva harady. Pa apošnich dadzienych, u Kanach užo aštrafavali čatyroch žančyn. Štraf składaje 38 jeŭra.
Musulmanie i hramadskija arhanizacyi, jakija zmahajucca ź isłamafobijaj, vystupili suprać zabaronaŭ. Na ich dumku, zabarona na burkini parušaje pravy musulman i žančyn. Sud admoviŭsia admianić zabaronu na burkini ŭ Kanach. Pravaabaroncy płanujuć padać apielacyju.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary