Častku nadpisu na majcy kandydata ad AHP Uładzimira Niapomniaščych padčas jaho televystupu prykryli citrami.
Vystupy kandydataŭ u deputaty pa akruhach u Homieli — Jubilejnaj № 31 i Sielmašaŭskaj № 32 prajšli na telekanale «Biełaruś-3» viečaram 16 žniŭnia. Uładzimir Niapomniaščych, viadomy svajoj majkaj «Za Biełaruś biez Łukašenki», bałatujecca pa Jubilejnaj akruzie. U hetaj ža futbołcy jon i zapisvaŭ vystup na TB.
Padčas efiru była bačnaja tolki častka nadpisu na majcy «Za Biełaruś», a druhaja častka — «biez Łukašenki» była prychavanaja citrami z proźviščam kandydata i numaram akruhi.
«Zabili moj nadpis. Ja, kali ŭbačyŭ pieršy vystup kandydata i hetuju vielizarnuju šeruju pałasu na pałovu ekrana, adrazu zrazumieŭ, dla čaho heta zrabili — kab zakryć nadpis na majoj majcy. U 2012 hodzie moj vystup naohuł nie vyjšaŭ u efir, a maju fatahrafiju u takoj majcy admovilisia prymać dla ahitacyjnych płakataŭ», — prakamientavaŭ BiełaPAN Uładzimir Niapomniaščych.
Taksama jon pieradaŭ svaju prahramu dla publikacyi ŭ hazietu «Homielskaja praŭda». Pavodle jaho słoŭ, u supracoŭnikaŭ vydańnia paŭstali pytańni da słoŭ u prahramie «Za Biełaruś biez Łukašenki». «Jany mnie skazali — u nas dziaržaŭnaja hazieta. Dziaržaŭnaja, tak, ale nie łukašenkaŭskaja ža! U vyniku nibyta abiacali, što prahrama vyjdzie, ale pahladzim», — skazaŭ kandydat.
Palityk zajaviŭ, što maje namier źniać svaju kandydaturu. «Vybaraŭ niama, nielha padmanvać siabie, svaju siamju, narod. Ja nie maju maralnaha prava iści da kanca. Kali b ja moh choć daviedacca pra svoj realny vynik, a nie nul ź niečym pracentaŭ, jakija mnie namalujuć ad bałdy», — dadaŭ Niapomniaščych.
U televystupie jon adznačaŭ, što vybaraŭ u krainie niama — heta «hulnia šarłatana z narodam u naparstki», i zaklikaŭ ludziej nie iści hałasavać, a pracavać naziralnikami na ŭčastkach.
Taksama pa Jubilejnaj akruzie bałatujucca dyrektar Instytuta nacyjanalnaj biaśpieki Ivan Korž, jaki raniej uznačalvaŭ UKDB pa Homielskaj vobłaści, člen Biełaruskaj partyi levych «Spraviadlivy śviet» Alaksandr Sucharučanka i člen ŁDP Aleh Danskich.
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach19
Kamientary