Namieśnik ministra adukacyi: Pražyć da piensii tolki z adnoj adukacyjaj ciapier nierealna

Pražyć da piensii tolki z adnoj adukacyjaj ciapier nierealna. Takoje mierkavańnie vykazaŭ pieršy namieśnik ministra adukacyi Biełarusi Vadzim Bohuš 11 maja na pres-kanfierencyi, adkazvajučy na pytańnie ab prahnozie zapatrabavanaści śpiecyjalnaściaŭ.

«Navat kali ty pracuješ u adnoj prafiesii, to pavyšać kvalifikacyju nieabchodna nie radziej, čym raz na piać hadoŭ, — upeŭnieny namieśnik ministra. — Ciapier vielmi šmat pierakryžavanych kvalifikacyj, kali treba atrymać dadatkovyja viedy. I ludzi vielmi časta vyrašajuć hetuju zadaču jak pavyšeńniem kvalifikacyi, tak i dadatkovaj adukacyjaj až da atrymańnia druhoj. I ŭ moładzi, jakaja imkniecca pašyryć svaje mahčymaści na rynku pracy i žadaje vyraści prafiesijna, hety trend prysutničaje: užo pracujučy, jany iduć vučycca znoŭ».

Pavodle jaho słoŭ, praktyka pakazvaje, što ludzi z bolš vysokim uzroŭniem adukacyi lahčej adaptujucca da rynku pracy. Jon adznačyŭ, što jość ludzi, jakija, majučy vyšejšuju adukacyju, dadatkova atrymlivajuć i rabočuju śpiecyjalnaść, što dazvalaje im na pracoŭnym miescy realizavać niekalki funkcyj.

Vadzim Bohuš taksama ličyć, što dadatkovy nabor va ŭstanovy adukacyi nieabchodny dla taho, kab čałaviek, jaki sapraŭdy choča vučycca, atrymaŭ takuju mahčymaść.

«Dapuścim, kali vy nie adhadali sa śpiecyjalnaściu i nie prajšli pa konkursie, a vučycca chočacie, hetuju zadaču vyrašaje dadatkovy nabor, — skazaŭ jon. — Takim čynam, vy nie vychodzicie z haliny, pastupajučy ŭ toj ža univiersitet, ale na inšuju śpiecyjalnaść, i atrymlivajecie tuju ž kvalifikacyju».

Pry hetym Bohuš adznačyŭ, što letaś prachadnyja bały na niekatoryja śpiecyjalnaści ŭ dadatkovy nabor byli vyšejšyja, čym u asnoŭny.

Pry vybary prafiesii pytańnie matyvacyi maje vialikuju rolu, ličyć namieśnik ministra. Kala 3% studentaŭ, jakija nie spraŭlajucca z navučalnym płanam, štohod vyklučajucca z VNU.

«Jość taki paradoks, što matyvavany student, jaki maje, moža być, nie vielmi dobryja viedy, ale prajaŭlaje žadańnie vučycca va ŭniviersitecie, umieje pieraadolvać składanaści i stanovicca vielmi dobrym śpiecyjalistam», — skazaŭ Bohuš.

U miežach dadatkovaha naboru adnačasova z hramadzianami Biełarusi z 26 pa 28 lipienia zmohuć udzielničać u konkursie na biudžetnyja vakantnyja miescy ŭ bolšaść VNU i hramadzianie Łuhanskaj i Danieckaj abłaściej Ukrainy. U konkursie na atrymańnie płatnaj vyšejšaj adukacyi, praduhledžanym dla biełarusaŭ, hramadzianie Łuhanskaj i Danieckaj abłaściej zmohuć udzielničać z 8 lipienia pa 15 kastryčnika.

U paraŭnańni ź minułym hodam na adzin dzień skaročanyja terminy pryjomu dakumientaŭ na biudžet — z 8 pa 14 lipienia. Pavialičanyja na adzin dzień terminy zaličeńnia na płatnaj asnovie dla hramadzian Biełarusi — z 2 pa 4 žniŭnia. Aptymizavanyja terminy pryjomnaj kampanii na zavočnuju formu navučańnia va ŭstanovy vyšejšaj adukacyi sielskahaspadarčaha profilu: pryjom dakumientaŭ — z 15 listapada pa 5 śniežnia; ustupnyja ispyty — z 6 pa 15 śniežnia, zaličeńnie — pa 20 śniežnia.

• 0
• 0
• 0
• 0
• 0
• 0
• 0
• 0