Prakuratura ŭ štacie Piensilvanija pradjaviła dvum hramadzianam Biełarusi zavočnyja abvinavačvańni ŭ dačynieńni da kradziažu 1,35 młn.dołaraŭ pry kibierataki na bank u ZŠA. Pra heta zajaviŭ žurnalistam u Pitsburhu prakuror Zachodniaj akruhi Piensilvanii Devid Chiktan.
Pavodle infarmacyi TASS, havorka idzie pra 34-hadovaha Alaksieja Jaraševiča i 41-hadovaha Jahora Paŭlenku. Pa dadzienych uładaŭ ZŠA, abodva jany byli zatrymanyja ŭ Minsku ŭ suviazi z rasśledavańniem dziejnaści mižnarodnaj chakierskaj hrupoŭki. Pavodle śćviardžeńnia prakuratury ŭ Pitsburhu, mužčyny datyčnyja da kradziažu 1,35 młn. dalaraŭ z rachunku ŭ amierykanskim banku naftahazavaj kampanii Penneco Oil, što bazujecca ŭ Piensilvanii
«Hetyja zatrymańni demanstrujuć, što my budziem brać pad kryminalny pieraśled za miažoj i pa ŭsim śviecie tych, chto ŭvachodzić u złačynnyja hrupoŭki, i damahacca, kab jany panieśli pakarańnie», - skazaŭ Chiktan.
Jak raniej paviedamlałasia sa spasyłkaj na Śledčy kamitet, biełaruskija pravaachoŭniki sumiesna z FBR spynili dziejnaść mižnarodnaj złačynnaj hrupy, jakaja krała srodki kampanij.
Ustanoŭlena, što ŭdzielniki złačynnaj hrupy na praciahu niekalkich apošnich hadoŭ z vykarystańniem škodnasnaha prahramnaha zabieśpiačeńnia zavałodvali rekvizitami bankaŭskich rachunkaŭ roznych kampanij. Tak, z rachunku bujnoj amierykanskaj kampanii hrupaj było vykradziena 1 młn. 350 tys. dołaraŭ ZŠA (pa ŭsim vidać, havorka išła ab Penneco Oil). U dalejšym złačynnaja hrupa sprabavała lehalizavać skradzienyja hrošy z dapamohaj śpiecyjalna stvoranych dla hetych metaŭ fiktyŭnych kampanij, zarehistravanych u Biełarusi, Kitai, Banhładeš i inšych krainach.
Pieršapačatkova ŭ krasaviku hetaha hoda ŭ paviedamleńni pres-słužby SK havaryłasia, što ŭ Minsku byli zatrymanyja dva aktyŭnyja ŭdzielniki złačynnaj hrupy — minčanie 1981 i 1974 hadoŭ naradžeńnia. U pačatku maja stała viadoma, što pa kryminalnaj spravie zatrymany treci ŭdzielnik hrupy — minčanin 1972 hoda naradžeńnia.
Zatrymanym prad`iaŭlena abvinavačvańnie va ŭčynieńni złačynstvaŭ, praduhledžanych č. 4 art. 212 KK (kradziež šlacham vykarystańnia kamp`iutarnaj techniki, učynieny arhanizavanaj hrupaj u asabliva bujnym pamiery). U dačynieńni da ich prymieniena miera strymańnia ŭ vyhladzie zaklučeńnia pad vartu.
Jak adznačała pres-słužba SK, załoham paśpiachovaha zaviaršeńnia apieracyi pa ŭstanaŭleńni i zatrymańni padazravanych asob pasłužyli prafiesijnyja sumiesnyja dziejańni Śledčaha kamiteta, Ministerstva ŭnutranych spraŭ, Hienieralnaj prakuratury Biełarusi i Fiederalnaha biuro rasśledavańniaŭ ZŠA.
Ciapier čytajuć
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz5858
Kamientary