Aksesuary da haradskoha łuku, dyzajnierskija prynty i instalacyja Jurja — etnacentr «Rahna» zaprašaje
Minsk, vuł. Suchaja, 4 / vuł. Karala, 22.
Narešcie pryhreła soniejka i Etnacentr «Rahna» prapanuje dadać u svoj viesnavy styl troški tutejšaha! A taksama zaprašaje naviedać instalacyju Jurja, kab bolš daviedacca pra heta śviata i ŭziać udzieł u staražytnym abradzie ŭ sučasnych umovach!
Rahna-styl: vybar tydnia #2
Rečy ad dyzajn-studyi «Adliha» hladziacca stylna, niečakana, a časam i pravakacyjna. Jany harantavana ŭzdymuć Vam nastroj (:
U jakaści dadatkaŭ da haradskoha łuku prapanujem aksesuary ručnoj pracy, a taksama aryhinalnuju skuranuju i draŭlanuju bižuteryju ad našych majstroŭ.
Darečy, cikavyja cišotki, łonhślivy i chudzi na našaj Vierchniaj kramie dla siabie zmohuć padabrać nie tolki dziaŭčaty – vialikaja kolkaść pryntoŭ u najaŭnaści i ŭ mužčynskaj viersii.
Usie detali vobrazu možna nabyć u kramach Etnacentru «Rahna»
Instalacyja «Jurja»
Śviata
Śviata narodnaha kalendara, jakoje adznačajecca 23 krasavika (6 traŭnia ŭ pravasłaŭnaj tradycyi) u honar Jurji – apiakuna płodnaści i ŭradlivaści ziamli, statkaŭ, vaładara vaŭkoŭ, Boskaha klučnika, jaki admykaje ziamlu i zamykaje zimu. U narodzie ŭjaŭlali Jurju na biełym kani ŭ biełym adzieńni.
Sialanie prosiać Jurju, kab toj paspryjaŭ bahatamu ŭradžaju. Z hetaj metaj jany vychodziać ź pieśniami i achviarnymi stravami ahladać svaje zaruniełyja paletki. Haspadar vynosić na pole karavaj ź letašniaj muki i hladzić, ci zakryjuć jaho novyja parastki. Heta śviedčyć ab tym, što sioleta ŭradžaj budzie ŭdałym. Pa kancach pola zakopvali kostki ad vielikodnaj stravy, kab nie rasło pustazielle, a na poŭnačy Biełarusi ŭ centry pola stavili aśviačonuju viarbu jak abiareh ad małanki.
Ź Jurjem taksama źviazvajecca i pieršy vypas skaciny. Starajucca vyhnać jaje jak maha raniej, kab žyvioły pačastavalisia travoj ź jurjeŭskaj rasoj, što zabiaśpiečvaje im zdaroŭje i płodnaść. Časam i sami ludzi kačajucca ŭ ranišniaj rasie, kab atrymać zdaroŭje na ceły hod. Asabliva jurjeŭskaja rasa dapamahaje pry zachvorvańni vačej.
Pierad paroham chlava zakładajuć šmatlikija abiarehi, kab abaranić žyviołu i zabiaśpiečyć jejnaje viartańnie dadomu — pajas, zamok, nity z krosnaŭ, jajka, siakieru i h.d. Jurja zamykaje paščy vaŭkam, ale ŭ toj ža čas pryznačaje kožnamu drapiežniku jahonuju zdabyču. Ad taho Jurja ličycca i ŭładarom vaŭkoŭ.
Husty jurjeŭski doždž taksama śviedčyć ab tym, što vyraście hustoje vialikaje žyta.
Instalacyja
Instalacyja JURJA ŭłučaje dźvie prastory.
Adna — Pryrodnaja, Dzikaja, Nieŭparadkavanaja čałaviekam. U hetaj prastory ŭ vaŭkoŭ jašče raziaŭlenyja paščy.
Praź jaje vy patraplajecie ŭ Płodnuju, Uradžajnuju, Sparadkavanuju prastoru, dzie złučajucca niabiosnaja (doždž) i ziamnaja (rasa) vilhać (simvały vilhaci ŭziatyja aŭtarami instalacyi z vakonnych lištvaŭ).
U hetaj prastory vy zakładajecie ŭ pole svaje ziernie-idei, papracavaŭšy nad jakimi, miarkujecie atrymać kankretny pośpiech, płady, uradžaj. Vy — haspadar — składiecie ŭ harščok-ziamlu simvaličnyja pradmiety — kluč, jajka, konia i roh. Takich harščkoŭ čatyry — na kožny kaniec pola.
Kluč — Jurja adkryvaje klučom ziamlu, paśla čaho jana rodzić. Padrychtoŭka hleby.
Jajka — simvał schavanaha žyćcia, nasieńnie.
Koń — heta aktyŭny mužčynski pačatak. Jon raźbivaje kapytom nasieńnie, ad čaho jano prarastaje.
Roh — simvał dabrabytu i bahaćcia.
Viartajučysia z pola, vy bačycie – paščy ŭ vaŭkoŭ užo zamknionyja.
Žadajem niesimvaličnaha ŭradžaju!
Kamientary