Profilnaje navučańnie pačnuć pašyrać u biełaruskich škołach z novaha navučalnaha hoda
Profilnaje navučańnie pačnuć pašyrać u biełaruskich škołach z novaha navučalnaha hoda. Ab hetym paviedamiŭ siońnia žurnalistam ministr adukacyi Michaił Žuraŭkoŭ pa vynikach narady ŭ kiraŭnika Biełarusi pa aktualnych pytańniach raźvićcia sistemy adukacyi.
Pavodle słoŭ ministra, sistema adukacyi ŭ škołach pavinna budavacca tak, kab da dziasiataha kłasa kožny vučań vyznačaŭsia, jak jon choča dalej udaskanalvać svaje viedy: pa inžyniernym, pryrodaznaŭčanavukovym, miedycynskim abo inšym napramku. «Inakš kažučy my budziem iści pa šlachu pahłybleńnia i pašyreńnia profilnaha navučańnia, razumiejučy pad hetym, što siudy ŭkładvajecca i paniaćcie prafiesijna-techničnaha navučańnia taksama», — skazaŭ Michaił Žuraŭkoŭ.
Hałoŭnaj zadačaj profilnaha navučańnia budzie padrychtavać vučnia da zdačy centralizavanaha teściravańnia i pastupleńnia ŭ VNU. «Pa profilnych piedahahičnych kłasach uniesieny prapanovy, kab ich vypuskniki mieli pieravahi pierad inšymi abituryjentami pry pastupleńni ŭ piedahahičnyja VNU», — dadaŭ ministr.
Što datyčycca prapanoŭ pa raźvićci vyšejšych navučalnych ustanoŭ, jakija prapracoŭvajucca ŭ novaj redakcyi Kodeksa ab adukacyi, kiraŭnik viedamstva adznačyŭ, što Łukašenka daručyŭ jašče raz uzhadnić usie navacyi z usimi zacikaŭlenymi strukturami.
«Tamu my jašče raz uvažliva prapracujem prapanovy, jakija datyčacca bakałaŭryjata, mahistratury, novych padychodaŭ da vyznačeńnia statusu vyšejšaj navučalnaj ustanovy. Kali ŭsio budzie hatova, padrabiazna daniasiom šyrokaj hramadskaści ab tym, što zastałosia ŭ novaj redakcyi kodeksa», — rastłumačyŭ ministr.
Ciapier čytajuć
Andreja Pačobuta pamianiali na łukašenkaŭskich špijonaŭ, aryštavanych u Polščy36
Kamientary