Rabotniki «Naftana» źviarnulisia da Kabiakova: «Pradpryjemstva pieratvaryłasia ŭ bankruta»
Rabotniki AAT «Naftan» źviarnulisia z adkrytym listom da premjer-ministra Andreja Kabiakova, kiraŭnika administracyi prezidenta Alaksandra Kosinca, staršyni Viciebskaha abłvykankama Mikałaja Šarstniova i kiraŭnika Fiederacyi prafsajuzaŭ Biełarusi Michaiła Ordy.
U svaim zvarocie jany śćviardžajuć, što pradpryjemstva znachodzicca ŭ vartym žalu stanie: «AAT «Naftan» z kvitniejučaha ŭ niadaŭnim minułym pradpryjemstva pieratvaryłasia ŭ bankruta.
Čamu ž, va ŭmovach pracy pradpryjemstva na poŭnuju zahruzku, kali pracaŭniki całkam vykonvajuć ustanoŭlenyja zadańni, u zavoda nie stała hrošaj? Čamu pavodle spravazdač Biełstata pakazčyki AAT «Naftan» u 10 razoŭ horšyja za pakazčyki mazyrskich kaleh?»
Pryčynaj ekanamičnych biazładzicy i raźvićcia karupcyi zajaŭniki bačać adchileńni ad kiravańnia zavodam «karennych» rabotnikaŭ i novapałačan.
«Na praciahu niekalkich apošnich hadoŭ z kirujučych pasad praktyčna całkam byli prybranyja ŭsie miascovyja śpiecyjalisty (hałoŭny inžynier, namieśnik pa budaŭnictvie, namieśnik pa ekanomicy, namieśnik pa biaśpiecy i h.d.) i na ich miescy rasstaŭlenyja nieprafiesijanały, jakija nikoli nie pracavali ŭ naftapierapracoŭcy i nie žyli ŭ Navapołacku», — havorycca ŭ liście.
Taksama ŭ dakumiencie paviedamlajecca ab pravale prahramy madernizacyi «Naftana». Pavodle infarmacyi aŭtaraŭ lista, ciapier nie hatovaja da ŭvodu ŭ ekspłuatacyju ni adna z zapłanavanych ustanovak i niama pieradumoŭ dla taho, što ŭ 2016 hodzie situacyja źmienicca, bo nie hatovaja i infrastruktura.
U toj ža čas zajaŭniki adznačajuć tendencyju kiraŭnictva ekanomić vyklučna za košt pracaŭnikoŭ: rabočych ŭhavorvajuć pahadzicca na skaračeńnie zarpłaty, prypynieńnie dziejańnia kalektyŭnaha dahavora i admienu šerahu lhot.
Pry hetym «Naftan» stračvaje abjekty sacyjalnaj śfiery: «…dziciačy łahier zavoda «Palimir», turbazu «Palimir», basiejn, niekalki spartkompleksaŭ i h.d. Spyniena vytvorčaść aharodniny ŭ zavadskoj ciaplicy. Ludzi skaročanyja. Harodninu ŭ kramy Navapołacka zavoziać z Turcyi i Jehipta. Na čarzie likvidacyja padsobnaj rybnaj haspadarki».
U suviazi z hetym zvarotam pracaŭniki «Naftana» čakajuć, što NPZ na nastupnym tydni naviedaje Alaksandr Łukašenka, infarmacyja pra heta źjaviłasia na sajcie połackaha filijała Respublikanskaj partyi pracy i spraviadlivaści.
Nahadajem, namieśnika hiendyrektara «Naftana» i jaho dvuch padnačalenych abvinavačvajuć u naniasieńni pradpryjemstvu ŭronu ŭ pamiery 46 miljardaŭ rubloŭ. Śledstva ličyć, što jany atrymlivali chabar pry zaklučeńni kantraktaŭ z kamiercyjnymi strukturami.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5151
Kamientary