Aryštavany adzin z najbahaciejšych biznesoŭcaŭ Biełarusi

Jaŭhien Šyhałaŭ

Supracoŭniki milicyi aryštavali viadomaha pradprymalnika, staršyniu rady dyrektaraŭ Handlovaha domu «Ždanovičy» Jaŭhiena Šyhałava. Na pačatku 90-ch Šyhałaŭ byŭ ślesaram u servisnym centry «AŭtaVAZ», a na 2008 hod vałodaŭ najbolšymi ŭ stalicy rynkami.

Pavodle «Sovietskoj Biełoruśsii», pa sutnaści pradjaŭlenych jamu abvinavačańniaŭ śledčyja orhany ad kamentaroŭ ustrymlivajucca.

Aficyjna nijakich surjoznych abvinavačvańniaŭ Jaŭhienu Šyhałavu da niadaŭniaha času nie pradjaŭlali, adznačaje «Biełaruski partyzan». Viadoma tolki pra vypadak z prakuraturaj, jakaja ŭhledzieła ŭ niejkaj z šmatlikich budoŭlaŭ, jakija viali firmy, padkantrolnyja Šyhałavu, samavolny zachop ziamli. Adnak naŭrad ci hetaje parušeńnie mahło stać sapraŭdnaj pryčynaj aryštu takoha ŭpłyvovaha čałavieka, miarkuje vydańnie.

Raspaviadajuć, što realny biznes‑kanflikt u Jaŭhiena Šyhałava u apošni čas byŭ tolki z «Pryjorbankam». Sprava ŭ tym, što Handlovy dom «Ždanovičy» vystupiŭ zasnavalnikam banku «Eŭrapiejski», i amal usie finansavyja płyni najbujniejšaha rynku Eŭropy pieravioŭ mienavita ŭ hety bank.

Chacia hetaja versija nie adzinaja. Jaŭhien Šyhałaŭ maje davoli dobryja adnosiny z meram Miensku Michaiłam Paŭłavym. Paŭłaŭ adnojčy heta navat adkryta prademanstravaŭ, kali prapanavaŭ uklučyć Šyhałava ŭ skład kiraŭnictva Biełarukaj federacyi tenisu, jakuju ŭznačalvaje. U kalaspartovych kołach tady naahuł nia viedali hetaha proźvišča, ale pa prośbie mera abrali Šyhałava namieśnikam staršyni federacyi (darečy, adnačasova ź Mikałajem Mirnym, baćkam i treneram Maksima Mirnaha).

Prajšli źviestki, što, akramia Jaŭhiena Šyhałava, u hetaj spravie zatrymanyja jahony namieśnik i dziaržaŭny čynoŭnik, jaki dapamoh zavałodać kavałkam ziamli pobač z rynkam «Ždanovičy». Adnak presavy sakratar MUS Aleh Ślepčanka hetyja źviestki ŭdakładniŭ: «Čujuć vucham, a pišuć brucham. Nie, jon kazaŭ, što šerah asob, jakija majuć dačynieńnie da hetaha biznesu, buduć jašče zatrymlivacca i pryciahvacca da adkaznaści».

U hihancki Handlovy centar «Ždanovičy» ŭvachodziać najbolšyja ŭ stalicy Charčovy i Rečavy rynki, Aŭtamabilny rynak, Rynak budaŭničych materyjałaŭ, Zoabataničny rynak, Načny hurtovy kirmaš sadaviny i harodniny. Da ich dałučylisia miasakambinat «Tarasava» i sielhaskambinat «Ždanovičy-Ahra», nia ličačy drabniejšych nabytkaŭ, jak restarany i spartovyja kluby.

«Ždanovičy»-rynak byli zasnavanyja ŭ 1994 hodzie, i raśli praz uvieś čas kiravańnia A. Łukašenki.

Sam Jaŭhien Šyhałaŭ prajšoŭ typovy dla postsavckich biznesoŭcaŭ šlach. Sajt gazetaby.com paviedamlaje, što jašče ŭ pačatku 90-ch jon pracavaŭ ślesaram u servisnym centry «AŭtaVAZ», što na Siarova - załatoj žyle savieckaha času - i trapić u biznes zdoleŭ nie biez dapamohi žanićby z dačkoj namieśnika dyrektara hetaha pradpryjemstva. Pačynaŭ Šyhałaŭ z handlu patrymanymi mašynami.

Mikoła Buhaj

Fota zhdanovichi.by

• 0
• 0
• 0
• 0
• 0
• 0
• 0
• 0