U Biełarusi źjaviŭsia partał kredytnaha rehistra creditregister.by, dzie moža daviedacca ab svajoj kredytnaj historyi ŭ režymie anłajn, paviedamiŭ žurnalistam načalnik upraŭleńnia «Kredytny rehistr» Nacbanka Viktar Plenkin.
«Kab pahladzieć svaju kredytnuju historyju, nieabchodna zajści ŭ asabisty kabiniet na sajcie i prajści identyfikacyju. Takim čynam, možna budzie ŭbačyć svaje abaviazacielstvy pierad bankami, kredytny rejtynh, skor-bał (acenka zdolnaści kredytaatrymalnika pahasić doŭh) i inšuju infarmacyju. Akramia taho, možna budzie daviedacca, chto raniej zapytvaŭ vašu kredytnuju historyju», — rastłumačyŭ Viktar Plenkin.
Pakul atrymać kredytnuju historyju praź internet mohuć tolki klijenty sistemy dystancyjnaha bankaŭskaha absłuhoŭvańnia «Biełhazprambanka». Płanujecca, što ŭ chutkim časie pasłuha budzie dastupnaja i dla klijentaŭ inšych bankaŭ.
Ciapier partał creditregister.by pracuje ŭ piłotnym režymie. U bližejšy čas na sajcie źjaviacca novyja funkcyi, u tym liku pasłuha atrymańnia kredytnaj historyi na płatnaj asnovie (biaspłatna jaje možna atrymać tolki adzin raz na praciahu kalandarnaha hoda, za płatu — nieabmiežavanuju kolkaść razoŭ). Ciapier atrymańnie kredytnaj historyi ŭ Nacbanku (druhi i nastupnyja razy na praciahu hoda) u papiarovym vyhladzie kaštuje prykładna Br50 tys. «U režymie anłajn košt jaje atrymańnia budzie značna nižejšy. Kančatkovaja cana pakul nie vyznačana, ale taki zapyt adnaznačna budzie tańniejšy», — padkreśliŭ Viktar Plenkin.
Kredytnaja historyja źmiaščaje asabistyja danyja — proźvišča, imia, imia pa baćku, datu naradžeńnia, asabisty numar, poł, hramadzianstva, miesca rehistracyi. Akramia taho, dastupna infarmacyja ab biahučych i minułych kredytach, pazykach, paručycielstvach, załohach: kali i jakim bankam vydadzieny kredyt, suma i termin jaho pahašeńnia, historyja apłaty zapazyčanaści, sumy i praciahłaść praterminovak, a taksama kali i jakomu banku pradastaŭlena paručycielstva, załoh, suma i termin zabieśpiačeńnia. Možna daviedacca i ab pieraliku arhanizacyj, jakija zapytvali vašu kredytnuju historyju i datu zapytu.
Kali klijent znachodzić u svajoj kredytnaj historyi niedakładnyja danyja, jon moža źviarnucca dla vypraŭleńnia ich u Nacbank abo bank, jaki padaŭ niapravilnuju infarmacyju.
Kamientary