Nacyjanalny bank sumiesna z uradam prymie miery pa pryviadzieńni aktaŭ zakanadaŭstva ŭ adpaviednaść z dekretam № 7, paviedamlaje ŭpraŭleńnie infarmacyi Nacbanka.
Dekret ad 11 listapada 2015 hoda «Ab pryciahnieńni hrašovych srodkaŭ va ŭkłady (depazity)» praduhledžvaje ŭviadzieńnie biezadzyŭnych i adzyŭnych dahavoraŭ raźmiaščeńnia ŭkładaŭ nasielnictva. Pieršy vid układaŭ padrazumiavaje, što terminovy depazit budzie znachodzicca ŭ banku na praciahu ŭsiaho terminu raźmiaščeńnia ŭkładu. «Pry zaklučeńni adzyŭnoha dahavora praduhledžvajecca mahčymaść daterminovaha viartańnia ŭkładu pa inicyjatyvie ŭkładčyka. Pry hetym peŭnyja terminy i ŭmovy viartańnia ŭkładu buduć prapisvacca ŭ dahavory pamiž bankam i ŭkładčykam», — zaznačaje Nacbank.
Raźmiaščeńnie ŭkładaŭ u bankach z hetaha času budzie rehulavacca dekretam prezidenta, jaki maje bolš vysokuju jurydyčnuju siłu ŭ paraŭnańni z Bankaŭskim kodeksam, rastłumačyli ŭ Nacbanku. «Takim čynam, z momantu nabyćcia siły dekreta № 7 norma častki treciaj artykuła 186 Bankaŭskaha kodeksa, jaki daje prava ŭkładčyku — fizičnaj asobie patrabavać daterminovaha viartańnia ŭkładu i abaviazak układaatrymalnika (banka) viarnuć układ ciaham piaci dzion, faktyčna prymianiajecca da dahavoraŭ bankaŭskaha ŭkładu, što byli zaklučanyja da 12 listapada 2015 hoda», — havorycca ŭ paviedamleńni Nacbanka.
U dačynieńni da dahavoraŭ bankaŭskaha ŭkładu, zaklučanych paśla nabyćcia siły dekreta № 7, praviły viartańnia ŭkładu buduć vyznačacca ŭ adpaviednaści z normami dekreta, zaznačyli ŭ Nacbanku.
Z ulikam hetaha Savietam ministraŭ i Nacyjanalnym bankam «buduć pryniatyja nieabchodnyja miery pa pryviadzieńni aktaŭ zakanadaŭstva ŭ adpaviednaść z dekretam № 7», rastłumačyŭ rehulatar.
Da pryniaćcia dekreta pa sutnaści ŭsie ŭkłady nasielnictva ŭ Biełarusi byli adzyŭnymi. Norma, zamacavanaja ŭ Bankaŭskim kodeksie, abaviazvała banki viarnuć depazit układčyku na praciahu piaci dzion pa patrabavańni klijenta.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary