Siońnia, 7 kastryčnika, baskietbolnaja mužčynskaja kamanda «Cmoki-Minsk» pačnie šlach ŭ adnym z najmacniejšych turniraŭ Staroha Śvieta — Adzinaj lizie VTB.
Pieršy matč padapiečnyja Ihara Hryščuka praviaduć u Kazani suprać UNIKSa — kłuba, jaki budzie imknucca značna palepšyć vyniki minułaha siezona. U tym liku i za košt nabytkaŭ, ź jakich vyłučajecca biełarus Arciom Parachoŭski.
Pačatak sustrečy a 18.30, nahadvaje aficyjny sajt biełaruskaha kłuba, jaki, darečy, viadziecca pa-biełarusku.
U minułym siezonie kiraŭnictva lihi VTB upieršyniu admoviłasia ad dzialeńnia kamand na hrupy. U vyniku 16 družyn zmahalisia pamiž saboj pa kłasičnaj dvuchkołavaj sistemie, jakaja ŭ svaju čarhu dadała pryvabnaści turniru. Pa-pieršaje, pavialičałasia kolkaść hulniaŭ. Pa-druhoje, razam ź joj pavialičałasia i kolkaść niepradkazalnych vynikaŭ. «Cmoki» ŭ vyniku finišavali na 15-m miescy.
U turniry biaruć udzieł 9 kamandaŭ z Rasii, pa adnoj ź Finlandyi («Bajzans»), Čechii («Nimburk»), Łatvii (VEF), Estonii («Kaleŭ»), Hruzii («Vita»), Kazachstana («Astana»).
Jašče hod tamu kłuby ź Litvy (piać kamandaŭ) demanstratyŭna admovilisia ad udziełu ŭ turniry.
Raskład najbližejšych matčaŭ
13 kastryčnika: «Jenisiej» (Krasnajarsk, Rasija) – «Cmoki-Minsk»
18 kastryčnika: «Cmoki-Minsk» — «Zienit» (Sankt-Pieciarburh, Rasija)
22 kastryčnika: VEF (Ryha, Łatvija) — «Cmoki-Minsk»
31 kastryčnika: «Krasny Akciabr» (Vałhahrad, Rasija) – «Cmoki-Minsk»
8 listapada: «Cmoki-Minsk» — «Nimburk» (Čechija)
Skončycca asnoŭny turnir 24 krasavika. Chatnija matčy «Cmoki» buduć pravodzić na «Minsk-Arenie».
Zajaŭka minskaha kłuba ŭ lizie VTB vyhladaje nastupnym čynam:
0. Entani Chilijard, 4. Pavieł Uljanka, 8. Ivan Maraš, 9. Raman Rubinštejn, 10. Branka Mirkavič, 11. Alaksiej Łaškievič, 12. Jaŭhien Bielankoŭ, 14. Haret Štutc, 15. Alaksandr Siemianiuk, 21. Vital Lutyč, 29. Siarhiej Kazłoŭ, 30. Dźmitryj Palaščuk, 41. Alaksandr Kudraŭcaŭ, 99. Džaścin Hrej.
Hałoŭny trenier: Ihar Hryščuk Asistenty treniera: Andrej Kryvanos, Raścisłaŭ Viarhun.
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie28
Kamientary