Rasiejskija daśledčyki apublikavali dakład «Biełorusskij nacionalizm protiv russkoho mira», u jakim pahražajuć, što hvałtoŭnaja «biełarusizacyja» moža pryvieści da «danbaskaha scenaru» ŭ Biełarusi.
Rasiejski fond «Narodnaja dyplamatyja» padrychtavaŭ daśledavańnie na 192 staronkach pra biełaruski nacyjanalizm, jaki jany nazyvajuć «miestačkovym».
Aŭtarami daśledavańnia vystupili palitolah Kirył Aviarjanaŭ-Minski i žurnalist Uładzisłaŭ Malcaŭ.
Pa słovach aŭtaraŭ dakładu, kryzis va Ŭkrainie «vyklikaŭ radykalizacyju biełaruskaj nacyjanalistyčnaj supolnaści i zaachvociŭ kiraŭnictva RB źviarnucca da nacyjanalistyčnaha paradku dnia». Jak prykład adznačajuć, što «dziasiatki maładych biełarusaŭ adpravilisia ŭ Danbas dla ŭdziełu ŭ karnych aperacyjach suprać žycharoŭ histaryčnaj Navarosii, a rytoryka Alaksandra Łukašenki časam stała nahadvać rytoryku Zianona Paźniaka dy inšych jahonych apanentaŭ z nacyjanalistyčnaha lahiera».
«Pakolki biełaruski nacyjanalizm maje znaročystuju antyruskuju skiravanaść, pracesy, jakija adbyvajucca ŭ Biełarusi, mohuć pryvieści da surjoznych sacyjalnych uzrušeńniaŭ. Biełaruś — ani nia mieniej ruskamoŭny i ruskakulturny rehijon, čym Danbas, a tamu hvałtoŭnaja «biełarusizacyja» moža pryvieści da paŭtoru ŭ RB «danbaskaha scenaru»», — havorycca ŭ dakładzie.
U toj ža čas aŭtary dakładu nahadvajuć, što viadučyja telekanały RF majuć u Biełarusi vielizarnuju aŭdytoryju, «a značyć, rasiejskaja dziaržava moža efektyŭna prasoŭvać ideju ahulnaruskaha adzinstva vielikarusaŭ, biełarusaŭ i ŭkraincaŭ (małarusaŭ), zdolnuju kankuravać ź idealohijaj miestačkovaha biełaruskaha nacyjanalizmu». «Tym bolš što ŭjaŭleńni pra ruskaje tryadzinstva ŭsio jašče žyvyja ŭ śviadomaści značnaj častki biełaruskich hramadzian», — upeŭnieny aŭtary dakładu.
Jany pišuć, što kali Rasieja ŭchilicca ad udziełu ŭ biełaruskaj idealahičnaj baraćbie, jość usie padstavy mierkavać, što «Biełaruś rušyć za prykładam krain Prybałtyki i Ŭkrainy, staŭšy jašče adnoj adkryta antyruskaj dziaržavaj na miažy z RF».
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»12
Kamientary