Pamienieła śviatła ŭ horadzie, u jakim jana naradziłasia i pražyła ŭsio žyćcio. Zvyš za paŭstahodździa — poruč z Valancinam Tarasam, da jahonaj apošniaj chviliny 13 lutaha 2009 hoda… I voś nadyšła jaje chvilina, jakuju jana mužna čakała — čakała sustrečy z mužam i, ad 2011-ha, z synam Vitalom…
Joj było 84. A ŭpieršyniu ja ŭbačyŭ jaje ŭ 1960-ja na teleekranie ŭ jakaści viadučaj papularnaj prahramy «Alesia», jakuju jana i stvaryła.
Paśla jana źnikła z teleekranaŭ. Ludzi z taho pakaleńnia pamiatajuć pra tak zvanuju «spravu Vakułoŭskaj», pra pieraśled z boku partyjnych uładaŭ i KDB jaje ŭdzielnikaŭ — piśmieńnikaŭ, žurnalistaŭ, navukoŭcaŭ… U tym liku Valancina Tarasa, jakoha zabaranili vydavać. A Rehinu Dźmitryjeŭnu zvolnili z telebačańnia. Jana mužna prajšła praz hetaje vyprabavańnie.
Jak i praz vyprabavańnie vajnoj i niamieckaj akupacyjaj, jakuju jana sustreła 10-hadovaj dziaŭčynkaj i pra što ŭ svoj čas raspaviała ŭ časopisie «Nioman». Ničoha bolš praniźlivaha pra Minsk tych časoŭ ja nie čytaŭ…
Mnie daviałosia siabravać z Valancinam Jafimavičam i Rehinaj Dźmitryjeŭnaj z 90-ch. I mianie zaŭsiody ŭražvała asablivaja ciepłynia ichniaha doma. Ja b nazvaŭ jaje ciepłynioj mudraści. Mudraści staŭleńnia da žyćcia, jakaja źmiaščaje ŭ siabie nieprymańnie niespraviadlivaści i ŭsialakaha falšu …
I adnačasova — niepadrobny humar, biaskoncaja dabrynia i viernaść siabroŭstvu.
Paśla zhadanaj «spravy Vakułoŭskaj» jana nikomu nie zdradziła — ni mužu, ni siabram, siarod jakich byli Vasil Bykaŭ, Navum Kiślik, Alaksandr Drakachrust, Ryhor Baradulin… Imiony, jakija naležać nie tolki minułamu — budučyni…
Rehina ŭ pierakładzie z łacinskaj movy — caryca…
Byvaj, caryca ź minskaj Staražoŭki! Chaj pobač z mužam i synam budzie tabie pucham ziamla, jakuju ty tak lubiła.
Kamientary