«Jon [Kazulin] admoviŭsia [vyjści na svabodu pry ŭmovie emihracyi ŭ Niamieččynu] navat paśla taho, jak jahonyja dočki pajechali i ŭhavorvali ŭratavać mamu, jamu hetaja mama ŭžo daŭno nie była treba...», — skazaŭ Łukašenka.
Pytańnie «tak zvanych palitviaźniaŭ» u Biełarusi zakryta. Pra heta zajaviŭ siońnia ŭ Viciebsku Alaksandar Łukašenka ŭ adkaz na pytańnie žurnalistaŭ.
A. Łukašenka sfarmulavaŭ adkaz zakavyrysta: «Ja dumaju, što toje, jak stavić pytańnie Eŭrasajuz pierad nami — nia varta vyjedzienaha jajka, i tamu mnoju było pryniataje rašeńnie vyzvalić tych ludziej, za jakich tak ratavaŭ Zachad i ZŠA".
Jon praciahvaŭ: «Jany, vidać, rabili dobryja spravy dla ES i ZŠA, i tyja ciapier ich u biadzie nia kidajuć». «Heta adzinaje, što mnie padabajecca ŭ pazycyi ES i ZŠA», — skazaŭ A. Łukašenka.
Jon praciahvaŭ, ekivokami: «Nakolki ja infarmavany, hetaja pazycyja nia ŭstroiła adnaho Kazulina. Pytańnie było ŭ tym, što jahonaja žonka chvoraja, i da mianie źviarnulisia pasły Eŭrasajuzu... Ja zhadziŭsia — chaj viazie, lečyć žonku. Siońnia staci pytańnie pra lačeńnie ŭ Hiermanii, treba supravadžać žonku... Ale nakolki rankam ja byŭ infarmavany, jon admoviŭsia jaje lačyć. Ale heta siamiejnyja prablemy, admoviŭsia, dyk admoviŭsia. Što treba ad mianie, ja prapanavaŭ, ale jon admoviŭsia jaje lačyć. Jon admoviŭsia navat paśla taho, jak jahonyja dočki pajechali i ŭhavorvali ŭratavać mamu, jamu hetaja mama ŭžo daŭno nie była treba... Ale ja nie chaču ŭłazić u čužyja działy, žyćcio ŭsie rasstavić pa svaich miescach».
A. Łukašenka tak padvioŭ vynik: «My zrabili biesprecedentny krok dobraj voli i ciapier pahladzim, jak adkažuć na heta ES i ZŠA. — Našamu narodu ja raju panazirać za reakcyjaj Zachadu: nakolki jany hatovy da kankretnych krokaŭ».
***
U Iryny Kazulinaj prapaŭ hołas
U Iryny Kazulinaj praz chvarobu prapaŭ hołas, jana absalutna nia moža havaryć, tamu pa kamentar my źviarnulisia da dački eks‑kandydata ŭ prezydenty Volhi.
«Naša Niva»: Vy čuli pra zajavy Łukašenki?
Volha Kazulina: Tak, čuła. Ja chaču skazać tolki adno — hulać na dušach i pačućciach inšych ludziej prosta niepryhoža. Niachaj lepš schodzić u carkvu i pamolicca. Nia treba prykryvacca chvarobaj majoj maci.
«NN»: Dyk a ŭ turmie padčas sustrečy na hetym tydni Vy abmiarkoŭvali z baćkam mahčymaść jahonaha vyzvaleńnia?
VK: My abmiarkoŭvali našu supolnuju budučyniu. Prabačcie, bolš skazać ja ničoha nie mahu.
***
Źmicier Daškievič: Kazulin zaśviedčyŭ svaju mužnaść
Prakamentavać piatničnyja zajavy Łukašenki my paprasili byłoha palitviaźnia Źmitra Daškieviča, jaki vyjšaŭ na volu 25 studzienia.
«NN»: Źmicier, što Vy dumajecie pra zajavy A. Łukašenki nakont Kazulina?
Źmicier Daškievič: Dumaju, što hety čałaviek čarhovy raz zaśviedčyŭ svaju niazłomnaść i mužnaść. Jahonaja stojkaść vartyja pavahi i šanavańnia. Zastajecca tolki pazyčyć Alaksandru Ŭładzisłavaviču duchoŭnaj mocy i tryvałaści na abranym im šlachu. Pierakanany, što Łukašenka nie dačakajecca na svajoj pasadzie, kali skončycca turemny termin źniavoleńnia Kazulina pavodle prysudu.
«NN»: Łukašenka adznačyŭ, što palitviaźnia “rabili dobryja spravy dla ZŠA i Eŭrasajuza”. Asabista ty što rabiŭ dla Ameryki i ES?
ZD: Maja dziejnaść, jak i dziejnaść “Maładoha frontu” tolki na Biełaruś, na duchoŭnaje abudžeńnie našaha narodu. Dumaju, što harant Kanstytucyi cudoŭna heta viedaje, tamu i robić takija zajaŭku. Jahonyja słovy nia jość słovami mocnaha palityka, a čałavieka zahnanaha ŭ kut, jaki musić ahryzacca.
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu20
Kamientary