U Biełarusi budzie reklama na jajkach

Užo siońnia niekatoryja ptuškafabryki majuć prajekty raźmiaščeńnia papularnych lahatypaŭ na abałoncy dyjetyčnaha praduktu.

Adnak napačatku — pra zvyčajnuju tradycyjnuju reklamu samich jajkaŭ.

Ptuškafabryka «Salihorskaja» — navatar u reklamnym biznesie kurynaha jajka. Tolki što ŭ Miensku na tralejbusach maršrutu №37 znoŭ źjaviŭsia śviežy lahatyp : «Jajco «Maładzieckaje‑luks» — brend №1 u Biełarusi! «. Taksama ŭ Miensku ŭ pieršy miesiac novaha hoda salihorskaje jajco kurynaje «Maładzieckija‑zabava» reklamavali hastranomy ŭ mikrarajonach. Na rynkach «Rakaŭski», «Kamaroŭski» i «Maskoŭski» taksama najbolš miescaŭ prodažu kurynych jajek ź vioski Krasnadvorcy, dzie mieścicca ptuškafabryka «Salihorskaja».

Čym ža možna patłumačyć ekspansiju pradukcyi peryferyjnaj fabryki na mienskich palicach?

Jak vyśviatlajecca, pradpryjemstva imkniecca atrymlivać u siarednim za hod bolš jak 80 000 000 štuk jajek. Salihorskamu rehijonu stolki nie spažyć. Kab zaachvocić pakupnikoŭ u inšych miaścinach, a taksama ŭ Rasiei, ptuškafabryka ŭpadabała brend seksualnaj stymulacyi.

U hutarkach sa specyjalistami pradpryjemstva ja, naprykład, pačuła, što niekali pierad luboščami kurynyja jajki z zadavalnieńniem truščyŭ Kazanova. Cikava taksama, što i Šejch Nafzai, aŭtar «Duchmianaha sadu», raiŭ jeści jak maha bolš smažanych u tłuščy jajkaŭ, kab zabiaśpiečyć siabie «palivam» dla kachańnia.

Jak samastojnuju stravu jajki možna jeści syrymi ŭ vyhladzie hohalu‑mohalu, a taksama pa‑roznamu zvaranymi: uśmiatku, u miašečku, ukrutuju. Možna pryhatavać roznyja amlety, faršyravać jajki, pasiekčy ź zialonaj cybulaj. Varyjantaŭ šmat, ale salihorcy — napieradzie ŭsich.

Zusim niadaŭna na ptuškafabrycy pačaŭ pracavać cech, dzie jajki marynujuć i vendziać. Termin realizacyi hetych dalikatesaŭ — da 19 sutak, u toj čas jak zvyčajnyja varanyja jajki zabaroniena jeści paśla dvuch sutak zachoŭvańnia. Reklamujecca, što ŭ marynavanych i vendžanych jajkach utrymlivajecca vitamin selen. Davodzicca, što selen abaraniaje serca, palapšaje krovazvarot, taksama palapšaje seksualnuju funkcyju…

Darečy, vitamin selen salihorskija ptušnicy dadajuć u zvyčajny ptušyny korm. Kažuć, niasuški z zadavalnieńniem spažyvajuć karysny mikraelement razam ź zierniem, a paśla dziakujuć selenavymi jajkami.

U mianie byŭ niedavier da taho, što selen zachoŭvajecca ŭ smažanych ci varanych jajkach, ale dyrektar ptuškafabryki Barys Zinčuk abviarhaje ŭsialakija sumnievy. Maŭlaŭ, u 100 hramach jajek «Maładzieckija‑luks» utrymlivajecca nia mienš jak 23 mkh pryrodnaha selenu. Za heta i adpaviednaja hrašovaja nadbaŭka — 500 rubloŭ na kožnym dziesiatku.

Ale, mažliva, što ŭ košcie jajek u Biełarusi čakajucca źnižki. U Ministerstvie sielskaj haspadarki i charčavańnia razhladajucca ciapier prapanovy ź rehijonaŭ ab raźmiaščeńni na kurynych jajkach kalarovaj reklamy.

Pra perspektyŭnaść hetych namieraŭ havoryć rasiejskaja praktyka. Pieršyja ahitacyjnyja jajki źjavilisia ŭžo na minułym tydni ŭ Błahavieščansku. Adzin z aŭtaraŭ idei — siabra partyi «Jedinaja Rośsija» Siarhiej Barysaŭ. Jon — dyrektar ptuškafabryki. Jajki pradpryjemstva ŭpryhožanyja čyrvonym nadpisam «Za Barysava». Dziesiatak hetych reklamnych jajek kaštuje 22 rubli — na 7 rubloŭ taniej jajek inšych vytvorcaŭ. Sa słovaŭ pamočnicy i žonki Aleny Barysavaj pakupniki da jajkavaj ahitpradukcyi «staviacca narmalna «.

U ZŠA na 35 miljonach jajek budzie krasavacca lahatyp telekanału CBS i nadpisy typu «CSI: Crack the Case on CBS» (reklama «Daśledavańnie ź miesca złačynstva»). Paviedamlajecca, što PR‑iajki — častka maštabnaj reklamnaj kampanii, jakuju CBS nazyvaje outernet‑stratehijaj.

Halina Baravaja, belnarod.org

• 0
• 0
• 0
• 0
• 0
• 0
• 0
• 0