Biełaruski vytvorca kavy paŭhoda nie płacić zarobak supracoŭnikam

Kampanija «Ikartajm», ajčynny vytvorca kavy, amal paŭhoda nie płacić zarobku. Supracoŭniki narakajuć, što ich miesiacami «kormiać abiacankami», niekatoryja zvalniajucca i padajuć u sud. Zasnavalnik razvodzić rukami: rachunki firmy zabłakavanyja z-za zapazyčanaści pa kredycie.

«Nie skaračajuć, nie zvalniajuć, prosta ludzi siadziać paŭhoda biez pracy i biez hrošaj. Kiraŭnictva abiacała, što zakryje doŭh to 8 sakavika, to 3 krasavika, to 17 krasavika. A hrošaj usio niama i niama», — napisaŭ u redakcyju supracoŭnik adnaho ź filijałaŭ kampanii, jaki paprasiŭ zachavać ananimnaść.

«Apošni zarobak pryjšoŭ 31 śniežnia a 8 hadzinie viečara.

Niekatoryja ludzi ŭžo zvolnilisia i padali ŭ sud, ale pakul ničoha nie atrymali, — udakładniŭ rabotnik, jaki źviarnuŭsia da FINANCE.TUT.BY. Jon rastłumačyŭ, čamu sam nie paśledavaŭ prykładu užo byłych kalehaŭ: — Niejkaja nadzieja [na vypłatu zarobku] ŭsio-taki była. Žyŭ na źbieražeńni i za košt žonki. Kali była praca, to i hrošy płacili niadrennyja, 7—8 miljonaŭ.

Zrešty, surazmoŭca płanuje zabrać pracoŭnuju knižku da kanca tydnia. Mužčyna nie vyklučaje, što padaść u sud, kab spahnać hrošy z pracadaŭcy.

Dvoje supracoŭnikaŭ ź inšych filijałaŭ «Ikartajm» paćvierdzili infarmacyju ab niavypłacie zarobkaŭ.

- Usio tak i jość. Dzied Maroz na Novy hod, jak havorycca, pieraličyŭ nam apošnija hrošy. Ja zabraŭ pracoŭnuju ŭ pačatku krasavika i źviarnuŭsia ŭ sud. Rašeńnie było vyniesiena na maju karyść, ale hrošaj ja pakul nie atrymaŭ, — paviedamiŭ były rabotnik kampanii. Pavodle jaho słoŭ, filijał, u jakim jon pracavaŭ, pakinuli ŭsie supracoŭniki, akramia adnaho.

Rabotniki «Ikartajm» raspłyvista kažuć ab pryčynach amal paŭhadavoj niavypłaty zarobkaŭ. Maŭlaŭ, niešta źviazanaje z bankaŭskim kredytam i błakavańniem rachunkaŭ kampanii.

Kampanija maje praterminavany kredyt u Biełahraprambanku, i rabotniki heta viedajuć, patłumačyŭ FINANCE.TUT.BY pradstaŭnik «Ikartajm».

— Bank nie choča prałanhiravać kredyt, u nas užo 8 miesiacaŭ aryštavanyja raźlikovyja rachunki. Nijak nie možam padpisać miravoje pahadnieńnie. Sudzimsia z bankam ŭ haspadarčym sudzie Minskaj vobłaści. Vypłata zarpłaty nie idzie, bo čakajem rašeńnia suda. 25 maja budzie apielacyja. Kali rachunki razbłakujucca, my pačniem płacić zarpłatu. Kali nie, budziem padavać [skarhu ŭ paradku nahladu] ŭ Viarchoŭny sud.

• 0
• 0
• 0
• 0
• 0
• 0
• 0
• 0