Biełaruski ŭrad realizavaŭ vymušanyja žorstkija miery pa makraekanamičnaj stabilizacyi, zajaviŭ premjer-ministr Andrej Kabiakoŭ na pasiadžeńni Savieta ministraŭ, na jakim byli razhledžanyja vyniki sacyjalna-ekanamičnaha raźvićcia krainy ŭ pieršym kvartale 2015 hoda i dadzienaja acenka vykanańniu zadańniaŭ.
«Za minuły pieryjad urad i Nacyjanalny bank paśladoŭna realizavali vymušanyja žorstkija miery pa makraekanamičnaj stabilizacyi, — zaznačyŭ Kabiakoŭ, słovy jakoha pryvodzić pres-słužba ŭrada. — Pa sutnaści, u ścisłyja terminy daviałosia adaptavać biudžet, bankaŭskuju sistemu, realny siektar krainy da pracy ŭ novych ekanamičnych umovach, vyklikanych abvałam cen na naftu, rezkaj devalvacyjaj rasijskaha rubla, jeŭra, hryŭny i inšych valut, recesijaj suśvietnaj ekanomiki i ściskańniem popytu ŭ našych klučavych handlovych partnioraŭ».
Pavodle słoŭ Kabiakova, žorstkija miery bałansavańnia nie mahli nie adbicca na tempach raźvićcia ekanomiki, pierš za ŭsio na realnym siektary i jaho finansavym stanie. Adaptacyja ekanomiki krainy da pryncypova inšaha źniešniaha stanovišča supravadžałasia padzieńniem VUP pavodle vynikaŭ pieršaha kvartała na 2%. Premjer-ministr zaznačyŭ, što asnoŭny ŭpłyŭ zrabiła źnižeńnie vałavoha dadadzienaha koštu ŭ pramysłovaści — minus 7,3% adnosna studzienia—sakavika 2014 hoda, adkrylisia prablemy nizkaj efiektyŭnaści šerahu bujnych pradpryjemstvaŭ, zališniaj zaniataści na ich, nizkaj kankurentazdolnaści, niedachopy ŭ vytvorčaj i markietynhavaj palitycy. Ustojlivy rost u sielskaj haspadarcy (105%), budaŭnictvie (104,7%), handli (101,1%) nie zmoh kampiensavać padzieńnie ŭ apracoŭčaj pramysłovaści (91,7%), transparcie i suviazi (96%). Pry zachavańni praktyčna na ŭzroŭni studzienia—sakavika 2014 hoda fizičnych abjomaŭ ekspartu siarednija ekspartnyja ceny źnizilisia na 29%, što stała asnoŭnym faktaram źnižeńnia abjomu ekspartu tavaraŭ amal na 30%.
«Adnak pry ŭsim ciažaru situacyi siońnia ŭ krainie zabiaśpiečanaja finansavaja i valutnaja stabilnaść, zapavoliłasia inflacyja, — padkreśliŭ Kabiakoŭ. — Zachoŭvajecca hnutki valutny kurs — roŭna taki, kab nie tracić zołatavalutnyja reziervy na jaho padtrymańnie.
Miery, jakija byli pryniatyja raniej i prymajucca zaraz, dazvalajuć utrymlivać biespracoŭje ŭ sacyjalna prymalnych miežach, a taksama zabiaśpiečvać nieabchodnyja harantyi i kampiensacyi nasielnictvu. Hałoŭny vynik: my žyviem pa srodkach».
«My bačym, što pieravažnaja bolšaść pradpryjemstvaŭ nie razhubilisia ŭ novych ekanamičnych umovach, abnavili asartymient pradukcyi, utrymlivajuć tradycyjnyja i namacvajuć novyja rynki zbytu, spraŭlajucca z kryzisnymi źjavami ŭłasnymi siłami, pracujuć nad vydatkami», — miarkuje kiraŭnik urada. Adnak na šerahu pradpryjemstvaŭ situacyja bolš ciažkaja: dla ich tradycyjnyja rynki zakrylisia, a na novyja ź isnaj namienkłaturaj pradukcyi pakul prabicca nie atrymlivajecca. «Za kožnym pradpryjemstvam stajać kankretnyja ludzi. My tut idziem svaim šlacham i pracujem pa dvuch kirunkach: indyvidualna raźbirajemsia z kožnym pradpryjemstvam i paralelna realizujem ahulnasistemnyja miery padtrymki. Situacyi va ŭsich roznyja, tamu vypracoŭvajem i niestandartnyja rašeńni», — zajaviŭ Kabiakoŭ.
Pavodle słoŭ kiraŭnika ŭrada, asnoŭnaja zadača — zachavać jadro i intelektualny patencyjał pradpryjemstvaŭ, jakija apynulisia ŭ składanaj ekanamičnaj situacyi. «Na pradpryjemstvach ź niapoŭnaj zaniataściu nieabchodna dać ludziam mahčymaść padzarabić, zakanadaŭstva heta dazvalaje. Abłvykankamam i ministerstvam u hetym pytańni nieabchodna prymać samyja aktyŭnyja miery», — zaznačyŭ premjer-ministr.
Kamientary