U Minsku «čornyja łabisty» brali adkat u pamiery 10% ad padradu za pieramohu ŭ dziaržaŭnych tendarach

U Viarchoŭnym sudzie praciahvajecca praces pa spravie Biełkaapsajuza. Jaho byłoje kiraŭnictva vinavaciać u karupcyi: za chabar vyznačali zabudoŭščykaŭ pad biełkaapsajuzaŭskija abjekty. Inšyja fihuranty spravy (dyrektary budaŭničych firm), pa viersii śledstva, hetyja chabary pieradavali.

Padčas suda vyjaviłasia schiema, pa jakoj pryvatnych zabudoŭščykaŭ schilali da chabaru. Isnavali ludzi, jakija spačatku damaŭlalisia ź biznesoŭcam, a zatym z kiraŭnictvam spažyvieckich sajuzaŭ — svajho rodu «čornyja łabisty». U vyniku adny atrymlivali hrošy ŭ kanviertach, druhija — zamovy.

Adnym z takich biznesoŭcaŭ źjaŭlajecca były dyrektar firmy «SanataBud» Alaksandr Drańkoŭ. Jaho vinavaciać u dačy chabaru. Za hetyja hrošy jaho firma pavinna była atrymać pieramohu ŭ tendary Biełkaapsajuza.

Alaksandr Drańkoŭ naradziŭsia ŭ 1948 u Mahiloŭskaj vobłaści. Maje vyšejšuju adukacyju. Udaviec u druhim šlubie. Ciapier nie pracuje. Ad pieršaha šlubu maje dvaich synoŭ i dačku.

U 2014 jaho asudzili na 3 hady z adterminoŭkaj na 2 hady za saŭdzieł u złoŭžyvańni słužbovymi paŭnamoctvami. Sprava tyčyłasia supracoŭnika UKB Viciebskaha abłvykankama, a epizod adnosiŭsia da 2008.

Patrebny «adkat»

Historyja ź Biełkaapsajuzam pačałasia piać hadoŭ tamu. «U pačatku 2010 ja farmalna pryniaŭ na pracu Hałavača Anatola. Nichto jaho nie afarmlaŭ, zarobak ja płaciŭ z ułasnych hrošaj. Jon źjaŭlaŭsia maim pamočnikam-kiroŭcam. Zimoj 2010, chutčej u lutym, jon skazaŭ, što maje znajomych, jakija mohuć akazać dapamohu ŭ atrymańni pracy na budaŭnictvie ŭ sistemie Biełkaapsajuza. Ale hetym asobam tre' budzie pieradać da 20 pracentaŭ ad ahulnaj sumy, pierakazanaj na rachunak», — zajaŭlaŭ Drańkoŭ. Biznesoviec paličyŭ sumu «adkatu» nierealnaj, ale jamu patrebny byli zamovy. Tamu pahadziŭsia sustrecca sa znajomymi svajho pamočnika.

Pavialičyć

Sustreča adbyłasia z Uładzimiram Lenskim i Andrejem Turčankam. Apošnija zajavili, što majuć suviazi ŭ kiraŭnictvie Biełkaapsajuza. Ale za stanoŭčaje vyrašeńnie pytańnia treba pieradać hrošy «navierch». Parazumielisia.

A jak firma Drańkova pieramahła ŭ tendary pa budaŭnictvie ŭ Horkach kramy z kaviarniaj i atrymała avans, Lenski z Turčankam paprasili jaho vykanać damoŭlenaść. Toj ža vyrašyŭ saskočyć i nie płacić.

«Praź niekatory čas Lenski i Turčanka pačali mnie zajaŭlać, što finansavańnie ŭ Horkach moža spynicca, a abjekt pieradaduć inšaj budaŭničaj kampanii. Što ŭ mianie ŭźniknuć prablemy sa zdaroŭjem, akazvali na mianie maralny cisk: dziažuryli pa načach kala majho doma». I tamu letam 2010 jon pieradaŭ im 15 tysiač dalaraŭ. Tak Drańkoŭ zajaŭlaje padčas dopytaŭ na śledstvie.

«Trapiŭ pad pres…»

Ciapier, na sudzie, Alaksandr Drańkoŭ pakazańni źmianiŭ i vinu svaju nie pryznaje. Raniejšyja słovy patłumačyŭ prosta: skazaŭ toje, što ad mianie čakali. Bo chacieŭ vyjści chutčej ź izalatara. U Drańkova ŭ toj momant była chvoraja žonka — ankałohija. I jon chacieŭ vyzvalicca, kab jaje dahladać. Tady napisaŭ «jaŭku z pavinnaj»: «Heta byŭ moj apošni varyjant, kab vyrašyć pytańnie z vychadam ź SIZA». Pakul viałosia rasśledavańnie jon aŭdavieŭ.

«Hrošy ŭ mianie vymahali», — ciapier kaža Drańkoŭ. I dadaje, što kali b jon zapłaciŭ chabar, vymahalnictva nie było b. Maŭlaŭ, hety fakt śviedčyć pra jaho nievinavataść.

Jak vyrašyłasia pytańnie vymahalnictvam?

«Hrošy ja nie pieradaŭ. U milicyju nie źviartaŭsia. Prosta spyniŭ ź imi [Turčankam, Lenskim] kantakty: nie staŭ adkazvać na ich zvanki. A što jany mahli mnie zrabić? Jany nie maje padnačalenyja, jany nie mieli nijakaha prava na toje, što rabili… I jany pierastali mianie dastavać», — užo na sudzie skazaŭ Drańkoŭ.

U nastupnym tendary «SanataBud» prajhrała.

«Usio — chłuśnia!»

«Usie pahrozy zvodzilisia da taho, što ja skazaŭ Turčanku (pakolki abjekt nie budavaŭsia — Drańkoŭ byŭ u zapoi): «Idzi jaho šukaj». Hrošy dziaržaŭnyja atrymanyja, a praca nie idzie. Voś usie vymahalnictvy, jakija byli, — asprečyŭ pakazańni Lenski. — Mnie pastajanna havaryli Siarhiej Dźmitryjevič [Sidźko] i Kałodziezny: «Čamu abjekt nie budujecca? Ty jaho zavaliŭ». Mnie było soramna, sprabavaŭ vyraŭniać situacyju, kab abjekt budavaŭsia». I śćviardžaje, što atrymaŭ ad Drańkova 15 tysiač dalaraŭ.

«Heta chłuśnia ad pačatku da kanca praktyčna, — zajaviŭ i Turčanka. — Vymahalnictva nie było i być nie mahło. Była damoŭlenaść pra 10% — suma «adkatu». Jak ja ŭžo zrazumieŭ, Drańkoŭ prosta dadaŭ siudy svaje 5% i jašče 5% Hałavač [u vyniku Drańkoŭ zajaviŭ pra 20%, jakija nibyta patrabavali]. I staŭ prapanoŭvać užo jak 20% Rybaku [dyrektar inšaj firmy, jakuju Drańkoŭ zaprašaŭ udzielničać u tendary na pracu ź Biełkaapsajuzam; Rybaka papiaredžvaŭ, što patrebny «adkat», kali jon vyrašyć pracavać]. Dla mianie heta vidavočna».

Lenski i Turčanka svaju vinu pryznali jašče ŭ pačatku pracesu.

Pa spravie Biełkaapsajuza ŭ jakaści abvinavačanych jašče prachodziać były kiraŭnik Biełkaapsajuza Siarhiej Sidźko, eks-načalnika ŭpraŭleńnia kapitalnaha budaŭnictva Biełkaapsajuza Dźmitryj Kałodziezny i jaho namieśnica Eleanora Sizuk. Sizuk vinu pryznała. Kałodziezny zajaviŭ, što hrošy atrymlivaŭ, ale nikomu nie spryjaŭ (na sudzie ahučvalisia i dziasiatki inšych epizodaŭ ź inšymi budfirmami). Sidźko ž svajoj viny nie pryznaje.

• 0
• 0
• 0
• 0
• 0
• 0
• 0
• 0