Francuzskija ratavalniki znajšli adnu z «čornych skryniaŭ» łajniera Airbus A320 avijakampanii Germanwings, jaki vykonvaŭ rejs 4U 9525 z Barsiełony ŭ Dziusieldorf i raźbiŭsia ŭ francuzskich Alpach.
Ministr unutranych spraŭ Francyi Biernar Kaźnioŭ zapeŭniŭ, što rasšyfroŭka zapisaŭ pačniecca adrazu, jak tolki prybor budzie dastaŭleny va Upraŭleńnie rasśledavańniaŭ i analizu, jaki adkazvaje ŭ Francyi za biaśpieku avijapieralotaŭ.
Samalot A320 paciarpieŭ krušeńnie ranicaj u aŭtorak na poŭdni Francyi ŭ departamiencie Alpy Vierchniaha Pravansa.
Pavodle najaŭnych dadzienych, nikomu z 150 čałaviek, jakija znachodzilisia na borcie, vyžyć nie ŭdałosia.
Abłomki samalota znojdzienyja ŭ harach na vyšyni 2000 mietraŭ. Pa słovach vyratavalnikaŭ, samalot razburyŭsia na drobnyja frahmienty, samy bujny ź jakich nie pieravyšaje pamierami małalitražny aŭtamabil. Abłomki łajniera raskidanyja ŭ harach na značnaj płoščy.
Vyśvietliłasia, što samalot nie padavaŭ nijakich sihnałaŭ biedstva až da padzieńnia.
U kiraŭnictvie avijakampanii Lufthansa, jakaja vałodaje łaŭkostaram Germanwings, zajavili, što ŭ dadzieny momant razhladajuć zdareńnie jak niaščasny vypadak, nazvaŭšy ŭsie inšyja viersii śpiekulacyjami.
Pa paviedamleńni kampanii Germanwings, usiaho na borcie łajniera znachodzilisia 150 čałaviek, u tym liku šeść členaŭ ekipaža. Adnak, jak užo zajaviŭ kiraŭnik kampanii Tomas Vinkielman, pryniata rašeńnie pakul nie publikavać śpis pasažyraŭ, kab zaścierahčy ad niedarečnaj publičnaści ich svajakoŭ.
Na borcie samalota znachodzilisia 16 niamieckich školnikaŭ i čaćviora vykładčykaŭ, jakija pryjazdžali ŭ Ljinars-del-Valjes (pravincyja Barsiełona) pa abmienie.
Baćki hetych vučniaŭ sabralisia ŭ škołu paśla taho, jak nikomu ź ich nie ŭdałosia źviazacca ź dziećmi pa mabilnych telefonach. Zaniatki ŭ hetaj škole časova admienienyja.
Tomas Vinkielman paviedamiŭ, što suviaź z samalotam pierapyniłasia ŭ 10:53 pa miascovym časie (12:53 pa Minsku), kali łajnier byŭ na vyšyni kala 2 tys. mietraŭ.
Zhodna z papiaredniaj infarmacyjaj, samalot ździejśniŭ chutkaje źnižeńnie z vyšyni 38,000 futaŭ (11,600m) na praciahu 8 chvilin. Padobnuju chutkaść źnižeńnia (bolš za 24 m/s) ekśpierty nazyvajuć ekstremalna vialikaj.
Kiraŭnik kampanii prainfarmavaŭ, što techničnaja pravierka samalota pravodziłasia napiaredadni ŭ Dziusieldorfie technikami kampanii Lufthansa. Kapitanam pavietranaha sudna byŭ vopytny lotčyk, jaki prapracavaŭ bolš za 10 hadoŭ u Lufthansa i Germanwings i mieŭ bolš za 6 tys. hadzin nalotu niepasredna na hetaj madeli «Aerobusa».
Ciapier čytajuć
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz5858
Kamientary